ADYM.KZ / Қазақстанда инфляцияның баяулауы мен базалық мөлшерлеменің төмендеуіне байланысты екінші деңгейлі банктердегі кредиттер мен депозиттер бойынша пайыздық мөлшерлемелер өзгереді. Бұл туралы Ұлттық банк төрағасы Тимур Сүлейменов өткен брифингте мәлімдеді.
Бас банкирдің айтуынша, ақша-кредит саясатындағы өзгерістердің халық пен бизнеске әсері бірден емес, біртіндеп байқалады. Базалық мөлшерлеме төмендегенде нарықтағы ақшаның құны да арзандай бастайды.
Тимур Сүлейменов бұл процестің екі жағы бар екенін заңдылықпен түсіндірді:
Кредиттер арзандайды: Банктер үшін сырттан қаржыландыру жинау құны төмендейтіндіктен, болашақта халық пен бизнеске берілетін несиелердің пайызы біртіндеп азаяды.
Депозит табысы кемиді: Салымшылардың банктегі депозиттері бойынша мөлшерлемелер де төмендейді. Өйткені депозит банктердің несие беруге қолданатын басты ішкі қоры. Бұл қор неғұрлым арзан жиналса, несие де соғұрлым төмен пайызбен беріледі.
«Базалық мөлшерлеме бір пайызға төмендесе, бұл әрқайсымыздың өмірімізге бірден әсер ете қоюы екіталай. Алайда, кредит алғысы келетіндер мөлшерлемелердің ықтимал төмендеуін, ал депозит иелері табыстың біртіндеп азаюын уақыт өте келе сезе бастайды»,- деді Ұлттық банк басшысы.
Ұлттық банк төрағасы қысқа мерзімді әсердің шектеулі екенін айта келе, басты жетістік инфляцияның баяулауында екенін баса айтты. Елдегі инфляция деңгейі 12-13 пайыздан 10,4 пайызға дейін төмендеген. Ол бұл көрсеткішті жақсы нәтиже деп бағалағанымен, алда әлі атқарылатын жұмыстың көп екенін жеткізді.
Анықтама: Қазақстанда кейінгі екі жылда алғаш рет базалық мөлшерлеме төмендетілді. Ұлттық банктің шешімімен ол жылдық 18,0 пайыздан 17 пайызға дейін (+/- 1 пайыздық тармақ дәлізімен) түсті.
