ADYM.KZ / Дүниежүзілік денсаулық сақтау ұйымы (ДДСҰ) Орталық Африкада Эбола вирусын жұқтырғандар санының күрт өскенін растады. Ұйым өкілдері қазіргі жағдайды «халықаралық маңызы бар қоғамдық денсаулық сақтау саласындағы төтенше жағдай» деп жариялап, бұл індет ауруды бақылау тарихындағы ең жойқын эпидемиялардың біріне айналуы мүмкін екенін ескертті.
Аурулардың өршуін болжау және талдау орталығының директоры Джейсон Ашердің айтуынша, қазіргі індеттің ауқымы 2014 жылы Батыс Африканы шарпыған жойқын эпидемияның көрсеткіштерімен теңесуі әбден мүмкін. Қазіргі уақытта дәрігерлер вирустың таралуын тежеу үшін күшейтілген режимде жұмыс істеп жатыр.
Соңғы ресми мәліметтер ДДСҰ мен аймақ елдерінің билігі жариялаған соңғы статистикалық мәліметтер бойынша, ауру жұқтырғандар мен көз жұмғандар саны бір тәуліктің ішінде айтарлықтай өскен: Конго Демократиялық Республикасында 452 адам жұқтырған, 82 адам қайтыс болды. Угандада 19 адам жұқтырған, 2 адам қайтыс болды. Екі ел бойынша ресми түрде 471 адам вирус жұқтырып, оның 84-і көз жұмды.
Маңызды дерек: Індеттің таралу қарқыны өте жоғары. Тек соңғы бір тәулік ішінде ауру жұқтырғандар саны 100 адамға, ал адам өлімі 20 жағдайға артқан. Жағдай сағат санап нашарлап барады.
Бұл жолғы індеттің басты қаупі оның сирек кездесетін және аз зерттелген түрі болуында. Эбола вирусының сирек кездесетін Бундибуджо (Bundibugyo) штаммы. Ресми түрде 15 мамырда КДР-ның солтүстік-шығысында жарияланды. Алайда, мамандар вирус бұған дейін де біраз уақыт бойы байқалмай, жасырын таралып келген деп есептейді.
Қазіргі уақытта дәл осы Бундибуджо штаммына қарсы арнайы мақұлданған вакциналар немесе тиімді емдеу әдістері жоқ. Дәрігерлер мен халықаралық ұйымдар вирус жұқтырғандар саны 500-дік межеге жақындаған сәтте індетті бақылаудан шығарып алмау үшін шұғыл шараларды қолға алуда.
