ADYM.KZ / Өзбекстан ұлттық құрамасы мен Англияның алпауыты «Манчестер Сити» клубының орталық қорғаушысы Абдуқодир Хусанов ресми түрде Азия құрлығының ең қымбат футболшысы ретінде тарихқа енді. Беделді Transfermarkt порталының маусым айындағы соңғы мәліметтеріне сәйкес, 22 жастағы қорғаушының нарықтық құны бірден 15 миллион еуроға өсіп, рекордтық 50 миллион еуроға жетті. Бұл көрсеткіш оны Азия рейтингінің көш басына шығарды.
Белоруссия чемпионатынан «Манчестер Ситиге» дейін Абдуқодир Хусановтың мансабындағы өсу қарқыны футбол сарапшыларын таңғалдыруда. 2022 жылы Өзбекстандық «Бунёдкор» академиясынан Белоруссияның «Энергетик-БГУ» клубына ауысты. 2023 жылы Францияның «Ланс» клубы оны небәрі 450 мың еуроға сатып алды. Ал, 2025 жылғы қаңтарда Француз клубы сапындағы үздік ойынынан кейін «Манчестер Сити» Хусановты 40 миллион еуроға (бонустармен 50 млн еуро) трансферледі.
2025/2026 жылғы тұманды Альбиондағы салтанатты маусым Хусанов үшін аса сәтті өтті. Ол Хосеп Гвардиола баптайтын команданың қорғаныс шебінде тұрақты орын алып, жалпы алғанда 37 ресми матчқа (Англия Премьер-лигасында 21 ойын, Чемпиондар лигасында 6 ойын) қатысты. Нәтижесінде ол «қалалықтармен» бірге бір маусымда қос бірдей беделді трофейді Англия Кубогы (FA Cup) мен Англия лигасының кубогын (EFL Cup) жеңіп алды.
Оның алаңдағы салқынқандылығы, жоғары жылдамдығы мен тартып алу шеберлігі құнының күрт өсуіне негізгі себеп болды.
Азия футболшыларының жаңа рейтингінде Хусанов бұл тізімде бұған дейін көш бастап келген жапондық және оңтүстік кореялық жұлдыздарды (соның ішінде Такефуса Кубо, Ким Мин Джэ, Ли Кан Ин) артқа тастады.
«Хусанов қазіргі уақытта әлемдік футболдағы ең дарынды әрі перспективасы жоғары жас қорғаушылардың бірі. Оның «Манчестер Сити» секілді алып клубта негізгі құрамға орнығуы Орталық Азия футболының жаңа деңгейге көтерілгенін білдіреді».
Хусановтың ағылшын клубымен келісімшарты 2029 жылдың жазына дейін есептелген. Маусым қорытындысы бойынша ол Англия Премьер-лигасында құны ең қатты өскен ТОП-10 футболшының қатарына енді.
