ADYM.KZ / «Сириус» федералдық аумағында өтіп жатқан балалар мен жастарға арналған «Сириус – Роза Хутор» халықаралық өнер фестивалі аясында «Астана Опера» мемлекеттік опера және балет театрының шығармашылық бағдарламасы ұсынылды.
ҚР Мәдениет және ақпарат министрлігінің баспасөз қызметінің мәліметінше, театр ұжымы сахнаға шығар алдында Қазақстан Президенті Қасым-Жомарт Тоқаевтың фестивальге қатысушылар мен ұйымдастырушыларға арнаған құттықтау хаты оқылды.
Мемлекет басшысы өз құттықтауында фестивальдің Ресей мен достас мемлекеттер арасындағы мәдени байланыстарды нығайтуға ықпал ететін маңызды гуманитарлық жоба екенін атап өтті. Сондай-ақ бұл өнер мерекесі жетекші шығармашылық ұжымдар мен жас таланттардың басын қосатын беделді алаңға айналғанына назар аударды.
«Бұл фестиваль мәдени-гуманитарлық ынтымақтастықты жаңа деңгейге көтеріп, елдеріміз арасындағы достық пен жан-жақты әріптестіктің одан әрі нығаюына серпін береді деп сенемін», – делінген Президенттің құттықтауында.
Фестиваль аясында «Астана Опера» әртістері «Сириус» концерт орталығының бас сахнасында француз балетмейстері Ролан Петидің хореографиясымен қойылған Лео Делибтің «Коппелия» балетін сахналады.
Қойылымға дирижер Руслан Баймурзин жетекшілік етті. Басты партияларды театрдың жетекші солистері Әйгерім Бекетаева, Арман Оразов және Олжас Тарланов орындады.
«Астана Операның» фестивальдегі гастрольдік бағдарламасы 16 шілдеге дейін жалғасады. Осы уақыт ішінде көрермендерге классикалық және заманауи балет қойылымдарымен қатар, театр әртіктері мен HasSak этно-фольклорлық ансамблінің қатысуымен ұлттық концерттік бағдарлама ұсынылады.
