ADYM.KZ / Оқуға түспеген, жұмыс істемейтін және кәсіби білім алумен қамтылмаған жастарды (NEET санаты) әлеуметтік ортаға бейімдеу, жұмыспен қамту және құқық бұзушылықтың алдын алу мақсатында Шымкент қаласында арнайы бағдарламалар жүзеге асырылуда. Осы бағыттағы жұмыстарды жүйелі ұйымдастыру үшін қалалық Жастар ресурстық орталығы жанынан Аутрич және NEET жастармен жұмыс бөлімі ашылып, нақты нәтижелерге қол жеткізілуде.
NEET санатындағы жастарды қолдау – олардың әлеуетін іске асыруға, еңбек нарығына араласуына және қоғам өміріне белсенді қатысуына мүмкіндік беретін маңызды бағыттардың бірі. Әсіресе әлеуметтік қолдауға мұқтаж, тұрақты жұмысы жоқ жастарды ерте анықтап, оларға қажетті көмек көрсету құқық бұзушылықтың алдын алуда ерекше маңызға ие.
Осы орайда, қаладағы төрт аудандық филиалдың қызметкерлері тұрғын үй алаптары мен шағынаудандарды аралап, жастармен тікелей байланыс орнатуда. Мамандар олардың әлеуметтік жағдайын зерделеп, жұмысқа орналасу, кәсіпкерлік негіздерін меңгеру және тегін оқыту курстарына қатысу мүмкіндіктері туралы ақпарат береді. Сонымен қатар жастарға кәсіби бағдар ұсынып, өз қабілеттеріне сай мамандық таңдауға және тұрақты табыс көзін табуға көмектеседі.
Әлеуметтік бейімдеу бағдарламаларының үйлестірушісі Әсел Жолдасбекова бұл бағыттағы жұмыстардың маңызын атап өтті.
«Жастардың бос уақытының көп болуы және жұмыссыздық – әлеуметтік тәуекелдерді күшейтетін факторлардың бірі. Біздің міндетіміз – әрбір жастың жағдайын анықтап, оны қоғамдық пайдалы іске тарту. Биылдың өзінде жұмыссыз жүрген жүздеген жас тұрақты жұмысқа орналастырылып немесе қысқа мерзімді кәсіптік курстарға жолданды. Жастардың білім алып, еңбекке араласуына жағдай жасау – олардың болашағына салынған инвестиция», – деді ол.
Мамандардың айтуынша, NEET санатындағы жастарды анықтау және оларды қолдау шараларымен қамту жұмыстары цифрлық платформалар арқылы да жетілдірілуде. Бұл жастардың қажеттіліктерін жедел анықтап, тиісті бағдарламаларға бағыттауға мүмкіндік береді.
Аталған бастамалар жастардың әлеуметтік бейімделуіне, жұмыспен қамтылуына және өмірлік мақсаттарын айқындауына ықпал етеді. Ал жүйелі профилактикалық жұмыс олардың қоғамнан шет қалуының алдын алып, құқықтық мәдениетін қалыптастыруға және қоғамдық қауіпсіздікті нығайтуға бағытталған.
