ADYM.KZ / Мемлекет басшысы «Мемлекеттік басқару және жергілікті өзін-өзі басқару мәселелері бойынша Қазақстан Республикасының кейбір заңнамалық актілеріне өзгерістер мен толықтырулар енгізу туралы» заңға қол қойды. Құжат 2026 жылғы 26 шілдеден бастап күшіне енеді.
Заңға сәйкес, алғаш рет мәслихат аппараты басшысының құзыретін айқындайтын жеке бап енгізілді. Енді аппарат басшысы мәслихат аппаратының жұмысын ұйымдастырып, үйлестіреді және бақылайды, сондай-ақ өз құзыреті шегінде мемлекеттік қызметшілерді тағайындау және қызметтен босату, тәртіптік және конкурстық комиссиялардың жұмысын үйлестіру, мемлекеттік қызметшілерді көтермелеу, оқыту, іссапарға жіберу және тәртіптік жауапкершілік мәселелерін қарайды.
Сонымен қатар аппарат басшысы мәслихат сессиялары мен тұрақты және уақытша комиссиялардың отырыстарын ұйымдастырып, мәслихат шешімдерінің жобаларын әзірлеуге, депутаттардың біліктілігін арттыру іс-шараларын ұйымдастыруға және сыбайлас жемқорлыққа қарсы заңнама талаптарының орындалуын қамтамасыз етуге жауапты болады.
Жаңа заңмен мәслихаттардың өкілеттігі де кеңейтілді. Енді депутаттар:
- әкімдердің халықпен кездесулерінде көтерілген мәселелерді шешу жөніндегі іс-қимыл жоспарларының орындалуын қарай алады;
- бюджеттік комиссиялардың жұмысына қатысады;
- елді мекендерді санитарлық тазарту қағидаларын бекітеді;
- тексеру комиссияларының төрағалары мен мүшелеріне тәртіптік жаза қолдану мәселесін қарайды.
Бұдан бөлек, заң депутаттық сауалдарды қарау мерзімін 30 күннен 15 күнге дейін қысқартады. Сондай-ақ жергілікті қоғамдастық жиналыстарының өкілеттігі кеңейтілді.
Құжатта мәслихат төрағаларына қатысты жаңа шектеу де қарастырылған. Енді бір адам облыстық, аудандық, республикалық маңызы бар қала немесе Астана мәслихатының төрағасы қызметін қатарынан екі мерзімнен артық атқара алмайды.
Айта кетейік, бұған дейін Парламент мәслихат депутаттарына бюджетке түзетулер енгізу құқығын беретін заң жобасын да мақұлдаған болатын.
