ADYM.KZ / Бүгін Шымкенттегі Қажымұқан Мұңайтпасов атындағы орталық стадионда Қазақстан Премьер-лигасының 12-туры аясындағы орталық матчтардың бірі өтті. Жергілікті «Ордабасы» өз алаңында алматылық «Қайратты» қабылдап, тартысқа толы кездесуде 2:1 есебімен жеңіске жетті.
Матчтың алғашқы голын 13-минутта «Қайраттың» бразилиялық шабуылшысы Жоржиньо соғып, қонақтарды алға шығарды. Алайда шымкенттік клуб көп ұзамай есепті теңестірді. 26-минутта камерундық қорғаушы Ги-Марселин Килама мергендігімен көзге түсті.
Екінші таймда «Ордабасы» шабуылды үдете түсіп, 64-минутта Сұлтанбек Астанов жеңіс голын соқты. Осылайша шымкенттік команда өз алаңында маңызды үш ұпайға қол жеткізді.
Кездесу жоғары қарқынмен өтіп, стадионға жиналған жанкүйерлер саны да ерекше назар аудартты. Матч алдында билет тапшылығы байқалып, Шымкентте футболдық атмосфера қалыптасты.
Ойынның бас төрешісі болып Булат Сариев қызмет атқарды.
Бұл жеңістен кейін «Ордабасы» турнирлік кестедегі жағдайын жақсартып, чемпиондық бәсекедегі басты үміткерлердің бірі екенін тағы бір мәрте дәлелдеді. Ал «Қайрат» үшін бұл маусымдағы маңызды ұпай жоғалту болды.
