Мемлекет басшысы Қасым-Жомарт Тоқаев Бейбітшілік кеңесінің Аға кеңесшісі Арье Лайтстоунды қабылдады. Кездесуде жаһандық қауіпсіздік, Газа секторындағы ахуал және көлік-логистика саласындағы ынтымақтастық мәселелері талқыланды, деп хабарлайды Adym.kz ақпараттық сайты Ақордаға сілтеме жасап.Президент Қазақстанның Бейбітшілік кеңесіне қатысуының маңызын атап өтіп, ұйым аясында нәтижелі серіктестік орнатуға бейіл екенін жеткізді:
«Біз Бейбітшілік кеңесінің негізін қалаушылардың бірі ретінде аталған институттың жаһандық қауіпсіздік пен диалогты нығайтуға тиімді ықпал ететініне сенімдіміз», — деді Мемлекет басшысы.
Кездесуде Қазақстанның Газа секторындағы ахуалды тұрақтандыруға, соның ішінде әлеуметтік инфрақұрылымды қалпына келтіру, білім беру, денсаулық сақтау жобаларын жүзеге асыру және азық-түлік қауіпсіздігін қолдауға бағытталған жоспарлары қаралды.
Арье Лайтстоун Қазақстанның халықаралық ұйымдар жұмысына белсенділігін және Ибраһим келісімдеріне қосылу жөніндегі шешімін жоғары бағалады. Ол сондай-ақ АҚШ Президенті Дональд Трамптың ыстық ықыласы мен лебізін жеткізіп, қазақстандықтарды Мемлекеттік рәміздер күнімен құттықтады.
Тараптар TRIPP және Орта дәліз (Транскаспий халықаралық көлік бағыты) аясындағы ықпалдастықты талқылады. Еліміздің халықаралық көлік бағдарларын әртараптандыруға және өңіраралық байланысты нығайтуға қызығушылығы зор.
Кездесу қорытындысы бойынша Президент пен Ұйым өкілі екіжақты және көпжақты күн тәртібіндегі ауқымды мәселелер бойынша ынтымақтастықты одан әрі тереңдетуге дайын екендіктерін нақтылады.
