ADYM.KZ / 12 маусымнан бастап Air Astana әуе компаниясы Астана мен Шымкент қалалары арасында жаңа тұрақты рейстерді іске қосады. Бұл туралы Шымкент қаласы әкімдігі хабарлады.
Жаңа әуе рейстері аптасына үш рет жұма, сенбі және жексенбі күндері орындалады. Әкімдік өкілдерінің айтуынша, бағыттың ашылуы мегаполис тұрғындары мен қала қонақтары үшін әуе қатынасының қолжетімділігін арттырып, көлік байланысын жақсартуға мүмкіндік береді.
«Қалалар арасындағы әуе қатынасының дамуы іскерлік, туристік және өңіраралық байланыстарды нығайтып, тұрғындардың мобильділігін арттыруға ықпал етеді», — деп мәлімдеді Шымкент қаласы әкімінің баспасөз қызметі.
Қала әкімдігі Мемлекет басшысы еліміздің көлік инфрақұрылымын жаңғыртуға, өңіраралық байланысты күшейтуге және заманауи логистикалық жүйе қалыптастыруға ерекше назар аударып отырғанын атап өтті.
Осыған байланысты әуе бағыттарын көбейту мен көлік қолжетімділігін арттыру стратегиялық маңызды міндеттердің бірі саналады.
Әкімдік мәліметінше, жаңа рейстердің ашылуы Шымкенттің еліміздегі ірі көлік, экономикалық және инвестициялық орталық ретіндегі рөлін күшейте түседі.
