ADYM.KZ / Кеше, 27 мамыр күні Ресей Президенті Владимир Путин Қазақстанға мемлекеттік сапармен келді. Ақорданың мәліметінше, сапар 27-29 мамыр аралығын қамтиды және Президент Қасым-Жомарт Тоқаевтың шақыруымен ұйымдастырылған. Келіссөздер барысында екіжақты стратегиялық серіктестік, сауда-экономикалық байланыс және Еуразиялық интеграция мәселелері талқыланбақ.
Сарапшылардың пікірінше, қазіргі халықаралық жағдайда Қазақстан мен Ресей арасындағы қарым-қатынастың жаңа кезеңін айқындайтын маңызды саяси оқиға. Әсіресе Украинадағы соғысқа байланысты Ресейдің Батыспен қарым-қатынасы күрделенген тұста Мәскеу үшін Орталық Азиядағы ықпалын сақтау стратегиялық маңызға ие болып отыр.
Еліміз үшін де Ресей негізгі экономикалық және логистикалық серіктестердің бірі. Екі ел арасындағы тауар айналымы соңғы жылдары 27-28 миллиард доллар шамасында сақталып келеді. Ресей Қазақстанның ең ірі сауда серіктестерінің қатарында. Сонымен қатар Қазақстан экспортының едәуір бөлігі Ресей аумағы арқылы өтетін транзиттік бағыттарға тәуелді.
Сапар аясында энергетика, көлік-логистика, өнеркәсіп кооперациясы және Еуразиялық экономикалық одақ аясындағы ынтымақтастық мәселелері негізгі күн тәртібіне шығуы мүмкін. Әсіресе Каспий бағыты, Солтүстік-Оңтүстік дәлізі және транзиттік маршруттарды әртараптандыру тақырыбы маңызды болмақ.
Бүгінде республикамыз өте күрделі геосаяси тепе-теңдікті сақтап отыр. Бір жағынан Ресеймен стратегиялық байланыс үзілген жоқ. Екінші жағынан Астана Батыс елдерімен, Қытаймен, Түркиямен және Еуроодақпен де қарым-қатынасты күшейтуге тырысуда. Сарапшылар мұны Қазақстанның “көпвекторлы саясат” моделінің жалғасы деп бағалайды.
Путиннің бұл сапары Мәскеудің Қазақстанмен саяси диалогты жоғары деңгейде ұстап тұруға мүдделі екенін көрсетеді. Соңғы жылдары Ресей үшін Орталық Азиядағы ықпал мәселесі өте өзекті бола түсті. Себебі аймақта Қытайдың экономикалық әсері күшейіп келеді, ал Түркия мен Батыс елдерінің де белсенділігі артып отыр.
Сапардың тағы бір маңызды қыры Еуразиялық экономикалық форум мен Жоғары Еуразиялық кеңес отырысының Астанада өтуі. Бұл Ресей үшін ЕАЭО жобасының өміршеңдігін көрсетуге мүмкіндік болса, Қазақстан үшін аймақтық экономикалық интеграциядағы рөлін күшейту алаңы саналады.
Путиннің Қазақстанға мемлекеттік сапары дәл осы шынайы геосаяси жағдайдың көрінісі ретінде бағалануда. Алдағы келіссөздердің нәтижесі екі ел арасындағы экономикалық ынтымақтастықтың бағытын ғана емес, Орталық Азиядағы күштер тепе-теңдігіне де ықпал етуі мүмкін.
