Бүгін Шымкентте «Таза Шым» қалалық акциясы аясында қоршаған ортаны қорғау, қала тазалығын сақтау және жастардың экологиялық мәдениетін қалыптастыру мәселелеріне арналған кездесу өтті. Жастар ресурстық орталығының бастамасымен «Заң мен тәртіп» қағидаты аясында ұйымдастырылған іс-шараның мақсаты – өскелең ұрпақтың табиғатқа жанашырлықпен қарауын қалыптастырып, қоршаған ортаның тазалығына деген жауапкершілігін арттыру.
Кездесуге Әл-Фараби ауданы прокуратурасының прокуроры Диана Оразымбетова, Экология департаменті басшысының орынбасары Дүйсен Құлтілеуов, «ASAA» жастар қоғамдық бірлестігінің президенті, Шымкент қаласындағы ACCESS бағдарламасының түлегі Данара Саранoва, Жастар ресурстық орталығы басшысының орынбасары Қуаныш Серікбай және 50-ге жуық жас қатысты.
Жиында қоршаған ортаны қорғау, экологиялық заңнама талаптарын сақтау және қалалық ортаның тазалығына әр азаматтың жауапкершілігі жөнінде пікір алмасылды. Қатысушылар экологиялық мәдениетті күнделікті өмір салтына айналдыру, тұрмыстық қалдықтарды дұрыс тастау, табиғи ресурстарды ұқыпты пайдалану және қоғамдық орындардың тазалығын сақтау мәселелерін талқылады.
Кездесуде тазалықтың әр адамның қарапайым әрекетінен басталатынына ерекше назар аударылды. Қоқысты арнайы жәшікке тастау, пластик бөтелке мен өзге де қалдықтарды бей-берекет қалдырмау, аула мен қоғамдық орындарды таза ұстау – қоршаған ортаға деген жауапкершіліктің көрінісі. Қаланың көркі мен тазалығы тек коммуналдық қызметтердің жұмысына емес, әрбір тұрғынның мәдениеті мен азаматтық ұстанымына да байланысты.
Жастар ресурстық орталығы басшысының орынбасары Қуаныш Серікбайдың айтуынша, 2024 жылдан бері «Таза Қазақстан» республикалық бағдарламасы аясында жастарды экологиялық бастамаларға тарту бағытында жүйелі жұмыстар жүргізіліп келеді. Тек биыл орталықтың ұйымдастыруымен 80-нен астам іс-шара өткізілген. Нәтижесінде қатысушылар 33 тоннадан астам қоқыс жинап, арнайы орындарға шығарған. Ал тазалық жұмыстарына 22 мыңнан астам шымкенттік жас қатысқан. Олардың қатарында мектеп оқушылары, студенттер мен кәсіпорын қызметкерлері бар.
Мұндай кездесулер жастардың экологиялық сауатын арттырып қана қоймай, қоғамдық жауапкершілігін нығайтуға ықпал етеді. Таза қала қалыптастыру – баршаға ортақ міндет. Сондықтан әр тұрғын қоршаған ортаға жанашырлықпен қарап, тазалықты өзінен бастауы қажет.








