ADYM.KZ / Премьер-министр Олжас Бектенов Президент жанындағы «жасыл экономикаға» көшу жөніндегі кеңестің отырысын өткізіп, «Таза Қазақстан» бастамасының іске асырылу барысын қарады. Кеңесте ағаш отырғызу, қалдықтарды қайта өңдеу, энергия тиімділігін арттыру және өңірлердегі экологиялық жобалардың орындалуы талқыланды.
Үкімет басшысы «Таза Қазақстан» енді бір реттік экологиялық акция емес, қоғамның экологиялық мәдениетін қалыптастыратын жүйелі мемлекеттік саясатқа айналуы тиіс екенін атап өтті.
Экология және табиғи ресурстар министрлігінің мәліметінше, жыл басынан бері ел бойынша 1 миллионнан астам ағаш отырғызылып, 4 миллионнан астам адамның қатысуымен 200-ден астам экологиялық іс-шара ұйымдастырылды. Нәтижесінде 76 мың гектардан астам аумақ тазартылып, 413 мың тонна қалдық шығарылды. Оның 115,7 мың тоннасы қайта өңдеуге жіберілді.
Кеңесте Ұлытау, Түркістан және Шығыс Қазақстан облыстарында атқарылған жұмыстардың нәтижелері таныстырылды. Өңірлерде ағаш отырғызу, аумақтарды тазарту, жаңа экологиялық нысандарды іске қосу және қалдықтарды қайта өңдеу жобалары жүзеге асырылып жатыр.
Сонымен қатар қалдықтарды басқару саласындағы жұмыстар қаралды. 2025 жылдың қорытындысы бойынша коммуналдық қалдықтарды сұрыптау және қайта өңдеу деңгейі 30,7 пайызға жеткен. 2030 жылға қарай бұл көрсеткішті 40 пайызға дейін арттыру жоспарланып отыр. Былтыр анықталған заңсыз қоқыс үйінділерінің 95 пайызы жойылса, биыл олардың саны айтарлықтай қысқарған.
Алайда Премьер-министр қалдықтарды қайта өңдеу бағытындағы бірқатар жобаның кешеуілдеп жатқанын атап өтті. Осыған байланысты Экология және табиғи ресурстар министрлігіне бір апта ішінде барлық жобаны қайта қарап, нақты шешімдер ұсыну тапсырылды. Өңір әкімдіктеріне заңсыз қоқыс үйінділерін жою жұмыстарын күшейту міндеттелді.
Отырыста энергия тиімділігін арттыру мәселесі де талқыланды. Үкімет басшысы Мемлекет басшысының 2029 жылға дейін экономиканың энергия сыйымдылығын 15 пайызға төмендету жөніндегі тапсырмасын еске салып, Ақмола, Ақтөбе, Шығыс Қазақстан, Қызылорда облыстары мен Астана қаласының әкімдігіне бір апта ішінде тиісті жол карталарын бекітуді тапсырды. Сондай-ақ Өнеркәсіп және құрылыс министрлігіне бұл бағыттағы көрсеткіштердің орындалуын тұрақты бақылауда ұстау жүктелді.
