ADYM.KZ / Биыл Қазақстанда Құрбан айт мерекесі 27-29 мамыр аралығында өтеді. Қазақстан мұсылмандары діни басқармасының мәліметінше, айттың алғашқы күні — 27 мамыр ресми демалыс күні болып жарияланды.
Құрбан айт қарсаңында елдегі мал базарларында сауда қыза түсті. Сарапшылардың айтуынша, биыл құрбандыққа шалынатын мал бағасы өткен жылмен салыстырғанда айтарлықтай өскен. EnergyProm зерттеуіне сәйкес, 2026 жылдың сәуірінде ірі қара мал бағасы бір жылда 15,6 пайызға, қой бағасы 8,8 пайызға қымбаттаған.
Қазіргі таңда Қазақстан бойынша бір қойдың орташа бағасы 77 мың теңге шамасында. Ал қошқар бағасы 86 мың теңгеге дейін жеткен. Кей өңірлерде баға бұдан да жоғары. Мәселен, Астанада қой бағасы 90 мыңнан 170 мың теңгеге дейін сатылып жатыр. Алматыда тоқтылар 110 мың теңгеге дейін жетсе, Атырауда баға 150 мың теңгеге дейін көтерілген.
Биыл ең қымбат құрбандық малы Түркістан облысында тіркелді. Мұнда кейбір асыл тұқымды қойлардың бағасы 200 мың теңгеге дейін жеткен. Ал ең арзан мал Ақтөбе, Қарағанды, Орал және Шымкент қалаларында сатылуда. Бұл өңірлерде қой бағасы 60 мың теңгеден басталады.
Сарапшылар бағаның өсуіне бірнеше фактор әсер еткенін айтады. Оның ішінде жем-шөп құнының қымбаттауы, логистика шығындарының артуы және маусымдық сұраныстың көбеюі бар. Әсіресе құрбандыққа арналған малға сұраныс мерекеге бірнеше күн қалғанда күрт артқан.
Қазақстан бойынша мал саны да өсіп келеді. 2026 жылдың наурызындағы мәліметке сәйкес, елдегі қой саны 21,1 миллион басқа жеткен. Бұл өткен жылмен салыстырғанда 2,3 пайызға көп. Ал ірі қара саны 9,2 миллион басқа жеткен.
Биыл онлайн құрбандық шалу қызметіне де сұраныс жоғары. ҚМДБ-ның qurban.muftyat.kz платформасы арқылы қазақстандықтар еліміздің кез келген өңірінен онлайн тапсырыс бере алады. Діни басқарма мәліметінше, шалынған құрбандық еті толықтай мұқтаж отбасыларға таратылып жатыр.
Мамандардың болжамынша, Құрбан айттың алғашқы күні мал базарларындағы баға тағы да өзгеруі мүмкін. Әсіресе ірі қалаларда сұраныс жоғары болып отыр.
