ADYM.KZ / Астанада 11-12 шілде күндері өтетін BaiQymyz-2026 халықаралық гастрономиялық фестиваліне келушілер үшін қоғамдық көлік қозғалысына уақытша өзгерістер енгізіледі.
Қала әкімдігінің мәліметінше, фестиваль өтетін «Қазанат» ипподромына тұрғындар мен қала қонақтарына қоғамдық көлікпен қатынауға кеңес беріледі. Сондай-ақ жол жүктемесін азайту мақсатында жеке автокөлікті пайдаланбаған жөн.
Осыған байланысты 7-13 шілде аралығында №18, №37 және №303 автобус бағыттарының қозғалыс сызбасы уақытша өзгереді. Бұл күндері аталған автобустардың бағыты «Қазанат» ипподромына дейін ұзартылады.
Ал фестиваль өтетін 11 және 12 шілдеде №18, №37 және №303 бағыттарындағы автобустар ұзартылған кестемен қатынап, жолаушыларды сағат 23:00-ге дейін тасымалдайды.
Еске салайық, BaiQymyz-2026 халықаралық гастрономиялық фестивалі 11-12 шілде күндері «Қазанат» ипподромында өтеді. Бағдарламада қымыздың түрлі сұрыптарынан дәм тату, «Үздік қымыз» халықаралық байқауы, жылқының ұлттық тұқымдары көрмесі, қолөнер жәрмеңкесі, қазақстандық эстрада жұлдыздарының қатысуымен концерттер, ұлттық және заманауи спорт түрлерінен жарыстар, сондай-ақ этномәдени және ойын-сауық іс-шаралары жоспарланған.
