ADYM.KZ / Шымкентте Халықаралық қарттар күніне орай қаланың бес ауданының ардагерлері арасында дәстүрлі спорттық турнир өтті. Сегізінші рет ұйымдастырылған жарысқа 60 адам қатысып, спорттың бірнеше түрінен өзара бақ сынады. Іс-шараның басты мақсаты – аға буын өкілдерінің денсаулығын нығайту, белсенді өмір салтын насихаттау және олардың қоғамдық өмірге араласуына мүмкіндік жасау.
Турнирдің ашылу салтанатында Шымкент қаласы әкімінің орынбасары Сәрсен Құранбек сөз сөйлеп, қалалық ардагерлер кеңесінің жұмысына жоғары баға берді. Ол қоғамның дамуына елеулі үлес қосқан аға буын өкілдеріне құрмет көрсету, олардың өмірлік тәжірибесін кейінгі ұрпаққа үлгі ету маңызды екенін атап өтті.
Қала ардагерлері қоғамдық өмірге белсене араласып, жастарға салауатты өмір салтын ұстанудың, өзара қолдау көрсетудің және белсенді болудың үлгісін көрсетіп келеді. Олар ел мен қаланың өркендеуіне үлес қосып қана қоймай, түрлі қоғамдық және спорттық іс-шараларға қатысу арқылы кейінгі буынға өнеге болуда.
Биылғы турнир бағдарламасына спорттың бес түрі енгізілді. Қатысушылар бильярд, үстел теннисі, шахмат, дойбы және волейболдан сынға түсті. Әр қатысушы алдымен өз ауданында іріктеу кезеңінен өтіп, үздік нәтиже көрсеткендер қалалық финалда бас қосты. Жарыстарды өткізу үшін арнайы спорт залдары әзірленді. Турнир қорытындысы бойынша жеңімпаздар мен жүлдегерлер анықталып, оларға медальдар, кубоктар мен грамоталар табысталады.
Ұйымдастырушылардың айтуынша, турнирдің маңызы жүлделі орындар үшін күреспен ғана шектелмейді. Мұндай кездесулер ардагерлердің өзара араласуына, тәжірибе бөлісуіне және ортақ қызығушылықтары арқылы достық қарым-қатынас орнатуына ықпал етеді.
– Біздің мақсатымыз – ардагерлер арасында спортпен тұрақты шұғылдануды насихаттау, олардың белсенділігін арттырып, денсаулығын нығайту. Ең бастысы – жарыстың нәтижесі емес, спортқа деген қызығушылық. Біз аға буын өкілдерінің көбірек қозғалып, жиі жүздесіп, қала өміріне белсенді араласа бергенін қалаймыз, – дейді қалалық ардагерлер кеңесінің төрағасы Кенжехан Төлебаев.
Оның айтуынша, мұндай турнирлер Шымкентте тұрақты өткізіліп келеді. Осы жылдар ішінде жарыс түрлі ауданда тұратын, ортақ қызығушылықтары бар ардагерлерді біріктіретін игі дәстүрге айналды.
Ардагерлердің спортқа деген ынтасы, жігері мен қоғамдық өмірге белсенді араласуы құрметке де, қолдауға да лайық. Осындай шаралар аға буынның өмір сапасын жақсартуға ықпал етіп қана қоймай, жастарды белсенділікке, табандылыққа және үлкенді сыйлауға тәрбиелейді.
