ADYM.KZ / 19 қазан – Құтқарушылар күніне орай Шымкент қаласы Жастар саясаты басқармасының «Жастар ресурстық орталығы» КММ ұйымдастыруымен жастардың қатысуымен кездесу өтті. Іс-шараның негізгі мақсаты – өскелең ұрпаққа құтқарушылар қызметінің маңызын түсіндіру, төтенше жағдайлардың алдын алу жолдарын таныстыру және қауіпсіздік ережелерін сақтау мәдениетін қалыптастыру.
Кездесуге «Жастар ресурстық орталығы» КММ басшысының орынбасары Қуаныш Бауыржанұлы Серікбай қатысып, құтқарушыларды кәсіби мерекесімен құттықтады. Ол адам өмірі мен қауіпсіздігін қорғау жолында қызмет ететін мамандардың еңбегі ерекше құрметке лайық екенін атап өтті.
Іс-шараға Шымкент қаласы Төтенше жағдайлар департаментінің ресми өкілі Асқар Рысбекұлы Шәріп, бас құтқарушы Үсен Аятханұлы Рахматуллаев, 3-өрт сөндіру бөлімінің қарауыл бастығы Даулет Нұрбекұлы Орынбек және патрульдік полиция полкінің қызмет инспекторы Жұмабай Нұрлан Елтайұлы қатысты.
Кездесу барысында спикерлер құтқарушы мамандығының қыр-сыры, қызмет барысында кездесетін қиындықтар және төтенше жағдай кезінде жедел әрі дұрыс шешім қабылдаудың маңызы туралы әңгімеледі. Сонымен қатар өрт, судағы оқыс оқиғалар және басқа да қауіпті жағдайлар кезінде сақталуы тиіс қауіпсіздік шаралары жөнінде пайдалы ақпарат беріп, кәсіби тәжірибелерімен бөлісті.
Мамандардың айтуынша, төтенше жағдайдың алдын алуда қарапайым қауіпсіздік талаптарын сақтау, қауіп-қатерді дер кезінде байқау және сабырлық таныту маңызды. Әсіресе жастардың су айдындарында, көшеде және қоғамдық орындарда қауіпсіздік ережелерін білуі жазатайым оқиғалардың алдын алуға көмектеседі.
Кездесу барысында патрульдік полиция полкінің қызмет инспекторы Жұмабай Нұрлан Елтайұлы Бадам өзенінде суға ағып кету қаупіне ұшыраған екі жас қызды аман алып қалған оқиғасын баяндады. Бұл оқиға қиын сәтте батылдық танытып, адам өмірін сақтап қалуға ұмтылудың маңызын көрсетті. Оның әңгімесі жастарға жауапкершілік пен азаматтық ұстанымның мәнін тереңірек түсінуге мүмкіндік берді.
Мұндай кездесулер жастардың қауіпсіздікке қатысты сауаттылығын арттырып қана қоймай, қоғамдағы құтқарушылар мен құқық қорғау органдары қызметкерлерінің рөлін кеңінен танытуға ықпал етеді. Адам өмірін қорғау жолында қызмет ететін мамандардың тәжірибесі жас буынға үлгі болып, жауапкершілік пен жанашырлық қасиеттерін қалыптастыруға септігін тигізеді.
Кездесу соңында қатысушыларға қауіпсіздік ережелерін күнделікті өмірде сақтау, төтенше жағдай кезінде дұрыс әрекет ету және қажет болған жағдайда тиісті қызметтерге жедел хабарлау қажеттігі түсіндірілді.
