ADYM.KZ / Алматыда жасанды интеллект негізінде жұмыс істейтін роботакси таныстырылды. Жаңа технологияны Қазақстан Республикасы Көлік вице-министрі Дамир Қожахметовке Yandex Qazaqstan компаниясы көрсетті.
Көлік министрлігінің мәліметінше, жоба пилоттық режимде кезең-кезеңімен іске асырылады. Алғашқы кезеңде роботакси шектеулі форматта сынақтан өткізіліп, кейін қауіпсіздік көрсеткіштері мен жинақталған тәжірибе негізінде қызмет ауқымы кеңейтіледі.
Роботакси жасанды интеллект технологиясы арқылы жұмыс істейді. Көлік жол қозғалысын үздіксіз бақылап, қоршаған ортаны талдау және қауіпсіз шешім қабылдау жүйелерімен жабдықталған.
Сервисте тәулік бойы диспетчерлік қолдау көрсетіліп, барлық сапарлар сақтандыру жүйесімен қамтылады.
Көлік министрлігінің хабарлауынша, Мемлекет басшысының тапсырмасына сәйкес пилотсыз көліктерді пайдалануға арналған заңнамалық база әзірленіп жатыр. Тиісті түзетулер роботаксилердің құқықтық мәртебесін, оларды пайдалану тәртібін және мемлекеттік органдардың құзыретін нақтылауды көздейді.
Пилоттық жобаларды жүзеге асыру үшін цифрлық инфрақұрылымы дамыған Алматы мен Астана негізгі алаң ретінде таңдалған. Ведомство өкілдері қауіпсіздік талаптарын сақтай отырып, заманауи көлік технологияларын енгізу жұмыстары жалғасатынын мәлімдеді.
Сарапшылардың пікірінше, роботакси технологиясының енгізілуі Қазақстандағы интеллектуалды көлік жүйелерін дамытуға және қалалық мобильділіктің жаңа деңгейіне көшуге мүмкіндік береді.
