ADYM.KZ / Шымкент қаласында 25 қазан – Республика күніне орай «Республика күні – елдігіміздің бастауы» тақырыбында мерекелік іс-шара ұйымдастырылды. Шымкент қаласы Жастар саясаты басқармасының «Жастар ресурстық орталығы» коммуналдық мемлекеттік мекемесі өткізген кешке жастар, қоғам белсенділері және мерекелік бағдарламаға қатысушылар жиналды.
Іс-шараның негізгі мақсаты – жас ұрпақтың бойында отансүйгіштік сезімді қалыптастыру, ұлттық құндылықтарды дәріптеу, мемлекеттік рәміздерге құрметті арттыру және ел тарихына деген қызығушылығын нығайту. Сонымен қатар мерекелік кеш жастардың азаматтық жауапкершілігін арттырып, ел болашағына деген сенімін күшейтуге бағытталды.
Салтанатты кеш Қазақстан Республикасының Мемлекеттік Әнұранымен басталды. Одан кейін «Жастар ресурстық орталығы» КММ-нің басшысы Жансерік Бауыржанұлы Жұман жиналған қауымды мерекемен құттықтады. Ол Республика күнінің ел тарихындағы маңызына тоқталып, жастардың мемлекет дамуына үлес қосуы, ұлттық бірегейлікті сақтау және тәуелсіздік құндылықтарын қадірлеу қажеттігін атап өтті.
Шара барысында жастар саясатын дамытуға және жас буынның қоғамдық белсенділігін арттыруға үлес қосып жүрген азаматтарды марапаттау рәсімі өтті. Бұл – қоғам игілігі жолында еңбек етіп жүрген азаматтардың қызметін бағалап, жастар бастамаларын қолдаудың маңызды көрінісі.
Мерекелік бағдарлама концерттік нөмірлермен жалғасты. Қуаныш Әбжапбар «Қазақстаным» әнін орындап, көрерменге патриоттық рух сыйлады. Қарлығаш Тиленнің «Аққу» биі ұлттық өнердің әсемдігін танытты. Ал Қазақстан Республикасы Ұлттық ұланының 6506 әскери бөлімінің әскери оркестрі музыкалық попурри орындап, кештің салтанатты мазмұнын аша түсті.
Бұдан бөлек, Шымкент қаласы Полиция департаментінің жылдам қимылдайтын арнайы жасақ қызметкерлері жауынгерлік тәсілдер бойынша арнайы көрсетілім ұсынды. Қызметкерлердің шеберлігі мен үйлесімді қимылдары көрермендердің қызығушылығын тудырып, қауіпсіздік пен қоғамдық тәртіпті қамтамасыз ететін мамандардың кәсіби дайындығын көрсетті.
Мерекелік кеш Нұрасыл Мақылбектің орындауындағы «Атамекен» әнімен қорытындыланды. Елге деген сүйіспеншілікті, туған жерге құрметті және ортақ құндылықтарды дәріптеген іс-шара қатысушыларға көтеріңкі көңіл күй сыйлады.
Республика күні – мемлекеттілігімізді нығайту мен ұлттық бірлікті дәріптейтін маңызды мереке. Осындай тағылымды шаралар жастардың ел тарихын тереңірек танып, тәуелсіздіктің қадірін түсінуіне және Қазақстанның жарқын болашағына жауапкершілікпен қарауына ықпал етеді.
