ADYM.KZ / Шымкент қаласы жастар саясаты басқармасының «Жастар ресурстық орталығы» КММ ұйымдастыруымен М. Әуезов атындағы Оңтүстік Қазақстан университетінің колледжінде жастарға арналған ақпараттық кездесу өтті.
Іс-шараның мақсаты – жастардың мемлекеттік бағдарламалар мен әлеуметтік қолдау шаралары туралы білімін арттыру, тұрғын үй алу мүмкіндіктерін түсіндіру және қолжетімді қаржылық құралдар жөнінде ақпарат беру.
Кездесуге «Отбасы банк» АҚ-ның қаржы кеңесшілері Нұрмағанбетова Феруза Мусилимовна мен Мамедалиева Эльмира Еламановна, сондай-ақ «Ізгілікте жарысайық» ҚҚҚ Волонтерлер мектебінің «Айбын» жобасының жетекшісі Ырзамберді Ерболат Асқарұлы қатысты.
Кездесу барысында мамандар жастарға тұрғын үйге қол жеткізу жолдары, мемлекеттік бағдарламалардың негізгі бағыттары және тұрғын үй жағдайын жақсартуға арналған мүмкіндіктер туралы түсіндірді. Сонымен қатар тұрғын үй жинақ жүйесінің ерекшеліктері, қаржылық жоспарлау және болашақта баспана алу үшін қаражат жинаудың маңыздылығы жөнінде ақпарат берілді.
Қатысушыларға мемлекеттік қолдау тетіктерін пайдалану кезінде ескерілуі қажет мәселелер түсіндіріліп, өз мүмкіндіктерін алдын ала бағалау мен қаржылық сауаттылықты арттырудың маңызы атап өтілді. Мамандар тұрғын үй алу мәселесінде нақты мақсат қойып, жеке қаржылық жоспар құрудың тиімділігіне тоқталды.
Ақпараттық кездесу ашық диалог форматында өтіп, жастар өздерін қызықтырған сұрақтарын қойды. Мамандар тұрғын үй бағдарламаларына қатысу шарттары, қажетті құжаттар және қаржылық мүмкіндіктерге қатысты сұрақтарға жауап берді.
Мұндай кездесулер жастардың мемлекеттік қолдау шаралары туралы хабардарлығын арттырып, олардың әлеуметтік және экономикалық мүмкіндіктерін кеңейтуге бағытталған. Сонымен қатар жастардың болашаққа сенімді қадам жасап, жеке мақсаттарына қол жеткізуіне қажетті ақпарат пен бағыт-бағдар алуға мүмкіндік береді.
«Жастар ресурстық орталығы» жастардың құқықтық және қаржылық сауаттылығын арттыруға, олардың қоғамдағы белсенділігін қолдауға бағытталған ақпараттық-түсіндіру жұмыстарын жалғастырады.
