ADYM.KZ / Халықаралық қарттар күніне орай Шымкент қаласының әкімі Ғабит Сыздықбеков аға буын өкілдерінің шаңырақтарына барып, оларды мерекемен құттықтады. Қала әкімі Рахматулла Мәуленов, Өркен Әбдіреев, Шәки Күлмажитов және Сәбит Рүстемовтің үйлерінде болып, қариялардың жағдайымен танысты.
Кездесу барысында аға буын өкілдері еңбек жолдары мен өмірлік тәжірибелері туралы естеліктерімен бөлісіп, отбасы құндылықтары мен ұрпақ тәрбиесі жайында әңгімелесті. Қала әкімі қарияларға зор денсаулық, ұзақ ғұмыр, бақ-береке және жан тыныштығын тілеп, олардың қоғам дамуына, қаланың қалыптасуы мен өркендеуіне қосқан үлесі үшін алғысын білдірді. Мерекеге орай естелік сыйлықтар табысталды.
Шымкентте қарт адамдардың өмір сапасын арттыруға, денсаулығын нығайтуға және белсенді өмір салтын қалыптастыруға бағытталған әлеуметтік қолдау шараларына ерекше көңіл бөлінеді.
Бүгінде қалада 105 мыңнан астам зейнеткер тұрады. Халықаралық қарттар күніне орай жасы 70-тен асқан 29 841 тұрғынға 3 АЕК мөлшерінде біржолғы әлеуметтік көмек көрсетілді. Сонымен қатар 80 жастан асқан жалғызбасты 101 қарияға ай сайын 2 АЕК көлемінде әлеуметтік төлем беріледі.
Қариялардың денсаулығын нығайту мақсатында санаторий-курорттық ем алуға да жағдай жасалған. Биыл осы бағытта 8 735 адамды қамту жоспарланып, қазіргі таңда 5 090 тұрғын тиісті жолдамамен қамтамасыз етілді.
Қаладағы «Белсенді ұзақ өмір сүру» орталығының төрт бөлімшесінде күн сайын 800-ден астам зейнеткер түрлі іс-шараларға қатысады. Мұнда қарт адамдардың бос уақытын тиімді өткізуіне, дене белсенділігін арттыруына және шығармашылық қабілеттерін дамытуына мүмкіндік беретін спорттық, шығармашылық және сауықтыру бағытындағы сабақтар ұйымдастырылған.
Әлеуметтік қолдау шаралары қоғамдық ортада белсенді араласуға да мүмкіндік береді. Атап айтқанда, 70 жастан асқан тұрғындар қоғамдық көлікте тегін жүреді. Сондай-ақ қарияларға театрларға, музейлерге, хайуанаттар бағына және дендросаябаққа тегін бару мүмкіндігі қарастырылған.
Мұндай қолдау шаралары аға буын өкілдерінің әлеуметтік белсенділігін арттырып, олардың қоғам өміріне толыққанды қатысуына жағдай жасауға бағытталған. Қариялардың өмірлік тәжірибесі мен өнегесі кейінгі ұрпақ үшін маңызды құндылық болып қала береді.
