ADYM.KZ / Жаңа Конституцияның күшіне енуі Қазақстандағы мемлекеттік-саяси жүйені жаңғыртып қана қоймай, инвесторлар үшін құқықтық тұрақтылық пен болжамдылықты күшейтті. Бұл туралы Премьер-министр Олжас Бектенов Инвестициялық ахуалды жақсарту жөніндегі кеңестің отырысында мәлімдеді.
Премьер-министрдің айтуынша, 1 шілдеден бастап жаңа Конституцияның күшіне енуімен елде жаңа мемлекеттік-саяси модельді қалыптастыру кезеңі басталды. Оның аясында жаңа заң шығарушы орган – Құрылтайға сайлау тағайындалып, жоғары консультативтік орган – Қазақстан Халық Кеңесінің Хатшылығы құрылды.
Сонымен қатар Конституциялық сот жаңа Конституциядағы бір реттік өкілеттік мерзіміне қатысты норманың қолданылу тәртібіне ресми түсіндірме берген.
Бектеновтің сөзінше, бұл норма жаңа Конституция күшіне енгеннен кейін, яғни биылғы 1 шілдеден бастап тиісті лауазымдарға тағайындалған немесе сайланған тұлғаларға ғана қолданылады. Атап айтқанда, бұл Президентке, Конституциялық соттың төрағасы мен судьяларына, Жоғарғы соттың төрағасына және Бас прокурорға қатысты.
«Конституциялық сот өз шешімімен аталған норманың қолданылу аясын нақты айқындады. Құқықтық айқындықтың қамтамасыз етілуі ішкі және сыртқы аудиторияны алаңдатқан бірқатар мәселені күн тәртібінен алып тастайды. Бұл саяси-құқықтық жүйенің тұрақтылығы мен болжамдылығына ерекше мән беретін инвесторлар үшін маңызды», – деді Премьер-министр.
Үкімет басшысы президенттік реформалардың қоғам тарапынан кең қолдау тауып отырғанын да атап өтті. Оның айтуынша, соңғы әлеуметтік сауалнама нәтижесінде қазақстандықтардың 87 пайыздан астамы елдің дұрыс бағытта дамып келе жатқанына сенім білдірген.
Бектеновтің пікірінше, реформаларға деген қоғамдық қолдау оларды тиімді жүзеге асырудың негізгі алғышарттарының бірі.
«Жаңа конституциялық модель мен жүйелі реформалар экономикамызды жаңғыртуға, халықаралық әріптестікті кеңейтуге және Қазақстанның инвестициялық тартымдылығын арттыруға берік негіз қалайды. Саяси және экономикалық реформалар ұзақ мерзімді әрі өзара тиімді серіктестікті дамытуға жаңа серпін береді», – деді Олжас Бектенов.
