ADYM.KZ / ҚР Денсаулық сақтау министрлігі елдегі дәрі-дәрмек бағасын тұрақтандыру мақсатында республиканың 20 өңіріндегі дәріханаларға ауқымды талдау жүргізді. Тексеріс қорытындысы бойынша нарықтағы бірқатар маңызды препараттардың құны төмендегені белгілі болды.
Министрлік мамандары «Тауарларды таңбалау және қадағалау» ақпараттық жүйесі арқылы 2 635 дәрілік заттың бағасын жіті салыстырып шықты. Нәтижесінде препараттардың 49,5 пайызының (1 309 атау) бағасы өзгеріссіз қалса, 20,4 пайызының (669 атау) бағасы арзандаған.
Бүгінгі таңда елімізде дәрі-дәрмек саудасын реттеу және халыққа қолжетімді ету бағытында жүйелі жұмыстар атқарылып жатыр. Қазіргі уақытта нарықтағы 4 994 дәрілік заттың ең жоғарғы шекті бағасы мемлекет тарапынан қатаң бекітілген. Дәріханалардың бұл бағадан асырып сатуға құқығы жоқ.
Тегін медициналық көмектің кепілдік берілген көлемі (ТМККК) мен міндетті әлеуметтік медициналық сақтандыру (МӘМС) жүйесі аясында 3 000-нан астам дәрі қосылған құн салығынан (ҚҚС) босатылған. Бұл тізімге, әсіресе, әлеуметтік маңызы бар ауруларға арналған өмірлік маңызды препараттар енген.
Дәрі қымбат болса не істеу керек? «DariKZ» арқылы шағым түсіру нұсқаулығы
Министрлік дәріханаларда баға негізсіз қымбаттаған жағдайда, әрбір азаматты белсенді болуға және өз құқығын қорғауға шақырады. Ол үшін арнайы DariKZ мобильді қосымшасы іске қосылған.
Шағым түсіру үшін не қажет? Дәріханадан сатып алған тауарлық чекті және дәрі сыртындағы қаптаманы (бағасымен бірге) суретке түсіріп, қосымша арқылы жіберу жеткілікті.
Сонымен қатар, бұл мобильді қолданба арқылы кез келген дәрілік заттың ресми бекітілген құнын тексеруге және дәрі-дәрмектің ағзаға тигізген күтпеген жанама әсерлері (аллергия, т.б.) туралы да құзырлы органдарға жедел хабарлауға болады.
