ADYM.KZ / Шымкент қаласы жастар саясаты басқармасының «Жастар ресурстық орталығы» КММ-нің ұйымдастыруымен Түркістан индустриалды-құрылыс колледжінің студенттері арасында «Этносаясатты түсіндіру және деструктивті діни ағымдардың зияндылығын насихаттау» тақырыбында ақпараттық-түсіндіру жұмыстары жүргізілді.
Кездесудің негізгі мақсаты – жастардың діни сауаттылығын арттыру, этносаралық келісімнің маңызын түсіндіру және деструктивті діни ағымдардың ықпалына қарсы иммунитет қалыптастыру. Сонымен қатар студенттердің зайырлы қоғам қағидаттары мен қоғамдық келісім құндылықтары жөніндегі білімін кеңейтуге басымдық берілді.
Іс-шараға Жастар ресурстық орталығының мамандары, Шымкент қаласы Дін істері басқармасының «Дін мәселелерін зерттеу орталығы» КММ бөлім басшысы Рауан Қыпшақбаев және Шымкент қаласы Ішкі саясат басқармасының «Қоғамдық келісім» КММ сарапшысы Нұржан Абдукаримов қатысты.
Кездесу барысында мамандар жастарға діни ақпаратты дұрыс қабылдау, күмәнді діни уағыздар мен материалдарды ажырата білу, сондай-ақ түрлі теріс ағымдардың ықпалына түспеу жолдарын түсіндірді. Діни сауаттылықты арттыруда сенімді ақпарат көздеріне сүйенудің және мәселелер бойынша білікті мамандардың кеңесіне жүгінудің маңызы атап өтілді.
Этносаясат тақырыбы аясында қоғамдағы өзара құрмет, этносаралық татулық пен қоғамдық келісімнің мәні кеңінен сөз болды. Мамандар ел ішіндегі тұрақтылықты сақтау үшін әр азаматтың жауапкершілігі жоғары екенін айтып, жастарды өзге этнос өкілдерінің мәдениеті мен құндылықтарына құрметпен қарауға шақырды.
Сондай-ақ зайырлы қоғам қағидаттарын сақтау, азаматтық бірегейлікті нығайту және жастардың қоғамдық өмірге саналы қатысуы мәселелеріне назар аударылды. Мұндай түсіндіру жұмыстары жас буынның сыни ойлау қабілетін дамытуға, ақпаратты саралай білуіне және қоғамдағы түрлі теріс ықпалдарға қарсы тұруына ықпал етеді.
Кездесу ашық пікір алмасу форматында жалғасты. Студенттер өздерін қызықтырған сұрақтарын қойып, мамандардан нақты жауаптар алды.
Осындай ақпараттық-түсіндіру шаралары жастардың діни және қоғамдық сауаттылығын арттыруға, этносаралық келісім мәдениетін қалыптастыруға және қоғамдағы тұрақтылықты нығайтуға бағытталған.
