ADYM.KZ / Шымкент қаласы жастар саясаты басқармасының «Жастар ресурстық орталығы» КММ ұйымдастыруымен Мирас университетінде жастар арасында лудомания мен зиянды әдеттердің алдын алуға бағытталған кездесу өтті.
Іс-шараның негізгі мақсаты – жастарға құмар ойынға тәуелділіктің адам өміріне, психологиялық жағдайына, отбасылық қарым-қатынасына және әлеуметтік ортасына тигізетін кері әсерін түсіндіру, сондай-ақ зиянды әдеттердің алдын алу бойынша ақпараттық-түсіндіру жұмыстарын күшейту.
Кездесу барысында лудоманияның тек жеке адамның мәселесі емес, отбасы мен қоғамға да әсер ететін әлеуметтік сипаттағы проблема екені сөз болды. Мамандар құмар ойынға тәуелділік адамның психологиялық жай-күйіне кері әсер етіп, күнделікті өміріне, оқуына, жұмысына және жақындарымен қарым-қатынасына қиындықтар туғызуы мүмкін екенін атап өтті.
Сонымен қатар жастарға тәуелділіктің алғашқы белгілерін дер кезінде байқап, мәселені жасырмай, мамандардың көмегіне жүгінудің маңызы түсіндірілді. Құмар ойынға қызығушылықты шектеу, бос уақытты тиімді ұйымдастыру, спортпен және шығармашылықпен айналысу, жақындарымен ашық қарым-қатынас орнату сияқты алдын алу шараларына да назар аударылды.
Кездесуде жастардың салауатты өмір салтын ұстануы, өз уақытын тиімді пайдаланып, пайдалы бастамаларға белсенді араласуы маңызды екені айтылды. Әсіресе жас буынның қаржылық және цифрлық сауаттылығын арттыру, құмар ойындардың жарнамасы мен оған қатысты тәуекелдерді дұрыс бағалай білу қажеттігі атап өтілді.
Іс-шараға Шымкент қаласы жастар саясаты басқармасының «Жастар ресурстық орталығы» КММ Психологиялық көмек көрсету бөлімінің маманы Ақсымбат Рашидқызы Әлімқұл, Тұран ауданы ардагерлер кеңесінің төрағасы Әділбек Сатыбалды, Тұран ауданы жастармен жұмыс жүргізу төрағасы Мақсат Серікбаев және Тұран ауданы ардагерлер кеңесінің алқа мүшесі Қалдыбек Тұрбаев қатысты.
Кездесу барысында жастар тарапынан қойылған сұрақтарға жауап беріліп, лудоманияның алдын алу және зиянды әдеттерден бойды аулақ ұстау бойынша тиісті түсіндіру жұмыстары жүргізілді.
Мұндай кездесулер жастардың мәселеге деген жауапкершілігін арттырып, салауатты әрі саналы өмір салтын қалыптастыруға ықпал етеді. Құмар ойынға тәуелділіктің алдын алу – жастардың ғана емес, отбасы, білім беру ұйымдары және жалпы қоғамның ортақ міндеті.
