ADYM.KZ / Қазақстан Президенті Қасым-Жомарт Тоқаев ҚР Президенті жанындағы Шетелдік инвесторлар кеңесінің 38-пленарлық отырысында елдегі логистика, цифрландыру және инвестициялық ынтымақтастықтың басым бағыттары туралы мәлімдеді.
Мемлекет басшысының айтуынша, еліміздің логистика саласына Smart Cargo цифрлық платформасы енгізілген. Біртұтас байланыс қағидаты бойынша жұмыс істейтін бұл жүйе негізгі халықаралық көлік дәліздерін цифрландыруға мүмкіндік береді.
Президент мұнай-газ саласын цифрлық трансформациялау бағытында да айтарлықтай жұмыстар атқарылып жатқанын атап өтті. Оның сөзінше, көмірсутек өндіру және өңдеу нысандарының цифрлық көшірмелері жасалып, мұнай мен мұнай өнімдерінің өндіруден бастап тұтынушыға дейінгі жеткізу тізбегін қамтитын кешенді бақылау жүйесі енгізіліп жатыр.
Сонымен қатар өндірістегі жабдықтардың істен шығуын алдын ала болжау, технологиялық үдерістердің сенімділігін арттыру және кәсіпорындардың жұмысын оңтайландыру үшін жасанды интеллект негізіндегі шешімдер қолданылуда.
Қасым-Жомарт Тоқаевтың айтуынша, «Астана» халықаралық қаржы орталығы жасанды интеллект саласындағы инновациялық жобаларды сынақтан өткізуге арналған сенімді алаң ретінде қызмет етеді. Сондай-ақ орталық инвесторларға ағылшын құқығына негізделген құқықтық орта мен деректерді қорғаудың жоғары стандарттарын ұсынады.
Президент инвестициялық ынтымақтастықтың маңызды бағыттарының бірі ретінде аса маңызды пайдалы қазбалар саласын атады. Оның айтуынша, Қазақстан жер қойнауын пайдалану саласын цифрландыруды жалғастырып келеді. Осы мақсатта лицензиялау және жер қойнауын пайдаланушылардың міндеттемелерін бақылауға қатысты 22 мемлекеттік қызметті автоматтандырған Бірыңғай жер қойнауын пайдалану платформасы іске қосылған.
Сондай-ақ бұрын қағаз және магниттік тасымалдағыштарда сақталған 4,7 миллионнан астам геологиялық құжат бірыңғай ұлттық цифрлық қорға көшірілді. Бұған қоса, тарихи геологиялық деректерді заманауи машина оқи алатын форматқа көшіру үшін жасанды интеллект технологиялары пайдаланыла бастады.
Мемлекет басшысы Астанада Сирек кездесетін металдар бойынша өңірлік зерттеу орталығын құру жоспарланып отырғанын да айтты. Оның сөзінше, бұл орталық халықаралық инвесторларға жоғары дәлдікпен дайындалған геологиялық деректерді ұсынатын бірыңғай алаңға айналады.
