ADYM.KZ / Мемлекет басшысының Құрылтайдың алғашқы сессиясында берген тапсырмаларын орындау аясында Үкімет өңірлердің әлеуметтік және инфрақұрылымдық әлеуетін арттыруға бағытталған жүйелі шараларды жүзеге асыруда.
Осы ретте Шымкент қаласында ана мен бала денсаулығын қорғауға және көлік инфрақұрылымын жаңғыртуға бағытталған екі ірі жоба қолға алынды. Олардың құрылысын жалғастыруға қосымша 33,5 млрд теңге бөлінді. Қаражаттың 10 млрд теңгесі жаңа перинаталдық орталықтың құрылысына, 23,5 млрд теңгесі халықаралық әуежайдың екінші ұшу-қону жолағын салуға бағытталды.
Ақжайық шағынауданында салынып жатқан жаңа перинаталдық орталық 200 төсек-орынға есептелген. Медициналық мекеме жылына 7 мың босануға қызмет көрсетуге мүмкіндік береді.
Орталықта акушерлік, гинекология және неонатология бөлімдерімен қатар, күрделі патологиясы бар жаңа туған нәрестелерге медициналық көмек көрсетуге арналған неонаталдық хирургия қызметі ұйымдастырылады. Сондай-ақ диагностикалық зертхана, генетикалық зерттеулер жүргізуге арналған база, консультациялық және оңалту бөлімшелері қарастырылған.
Жобаның негізгі мақсаты – ана мен балаға көрсетілетін медициналық көмектің сапасы мен қолжетімділігін арттырып, заманауи медициналық инфрақұрылымды қалыптастыру.
Шымкент халықаралық әуежайында екінші ұшу-қону жолағының құрылысы да жалғасуда. Ұзындығы 3 900 метр, ені 75 метр болатын жаңа жолақ әуежайдың өткізу мүмкіндігін арттыруға және әуе тасымалының тұрақтылығын қамтамасыз етуге бағытталған.
Жоба аясында қажетті инженерлік инфрақұрылым, такси жолдары, авариялық-құтқару нысандары және әуеайлақтың жарық сигналдық жабдықтары қарастырылған. Бұл әуежайдың жолаушылар мен жүк тасымалындағы мүмкіндігін кеңейтіп, Шымкенттің көлік-логистикалық әлеуетін арттыруға мүмкіндік береді.
Медициналық және көлік инфрақұрылымына бағытталған бұл жобалар Шымкенттің әлеуметтік-экономикалық даму қарқынына сәйкес қалалық инфрақұрылымды жаңғыртудың маңызды бағыттарын қамтиды.
Мемлекет басшысының тапсырмаларын іске асыру шеңберіндегі мұндай жобалар азаматтарға көрсетілетін әлеуметтік қызметтердің сапасын арттырумен қатар, өңірлердің ұзақ мерзімді даму әлеуетін нығайтуға бағытталған.
