ADYM.KZ / Шымкент қаласы жастар саясаты басқармасының «Жастар ресурстық орталығы» КММ ұйымдастыруымен Азимед медициналық колледжінде «Нашақорлық пен АИТВ/ЖИТС-тің алдын алу» тақырыбында ақпараттық-түсіндіру кездесуі өтті.
Іс-шараның негізгі мақсаты – жастар арасында есірткі қолданудың алдын алу, АИТВ инфекциясы туралы дұрыс түсінік қалыптастыру, қауіп факторлары жөнінде ақпарат беру және салауатты өмір салтын ұстанудың маңызын түсіндіру.
Кездесуге Шымкент қаласының денсаулық сақтау басқармасына қарасты «ЖИТС-тің алдын алу және оған қарсы күрес жөніндегі орталықтың» алдын алу бөлімінің маманы Аяжан Джарасбай, ШЖҚ Психикалық денсаулық сақтау орталығының психологы Айнұр Полатовна және Жастар ресурстық орталығының Аутрич және NEET жастармен жұмыс бөлімінің маманы Сабина Сагинтай қатысты.
Кездесу барысында мамандар жастарға нашақорлықтың адам денсаулығына және өмір сапасына тигізетін кері әсері туралы кеңінен түсіндірді. Есірткіге тәуелділіктің адамның физикалық және психологиялық жағдайына ғана емес, оның әлеуметтік ортасы мен болашағына да кері ықпал етуі мүмкін екені айтылды.
Психолог жастардың түрлі қиын жағдайларға тап болған кезде психологиялық қолдауға жүгінудің маңызын атап өтті. Сондай-ақ күйзеліс, жалғыздық, құрдастар тарапынан қысым сияқты жағдайларда дұрыс шешім қабылдау, өз эмоциясын басқару және зиянды әдеттерден аулақ болу жөнінде кеңестер берілді.
Іс-шараның маңызды бағыттарының бірі – АИТВ/ЖИТС-тің алдын алу мәселесі болды. Сала маманы жастарға АИТВ инфекциясы туралы негізгі ақпарат беріп, оның берілу жолдары мен алдын алу шараларына тоқталды.
Маман жастарды АИТВ-ға қатысты жалған ақпарат пен қате түсініктерге сенбеуге, денсаулық мәселесінде тек сенімді медициналық ақпарат көздеріне жүгінуге шақырды. Қажет болған жағдайда медициналық ұйымдарға барып, мамандардан кеңес алудың маңызы түсіндірілді.
Сонымен қатар нашақорлық пен АИТВ инфекциясының алдын алу мәселелерінің өзара байланысына назар аударылды. Жастарға қауіп факторларын білу, қауіпсіз мінез-құлық қағидаларын сақтау және өз денсаулығына жауапкершілікпен қарау қажеттігі айтылды.
Кездесу барысында студенттер мамандарға өздерін қызықтырған сұрақтарын қойып, нашақорлықтың алдын алу, психологиялық қолдау және АИТВ инфекциясынан сақтану жолдары бойынша жауаптар алды.
Мамандар жастардың бос уақытын тиімді ұйымдастырып, спортпен шұғылдану, шығармашылықпен айналысу, білім алуға және жеке дамуға көңіл бөлу секілді пайдалы әдеттерді қалыптастырудың маңызын атап өтті.
Салауатты өмір салты – адамның денсаулығын сақтаудың ғана емес, оның толыққанды әрі белсенді өмір сүруінің маңызды негіздерінің бірі. Осыған байланысты жастардың зиянды әдеттерден бас тартып, денсаулығына саналы түрде жауапкершілікпен қарауы маңызды.
Осындай ақпараттық-түсіндіру кездесулері жастардың медициналық және психологиялық сауаттылығын арттырып, түрлі қауіп-қатерлердің алдын алуға бағытталған дұрыс шешім қабылдауына мүмкіндік береді.
Іс-шара соңында мамандар жастарды есірткі мен өзге де зиянды әдеттерден аулақ болуға, салауатты өмір салтын ұстануға және өз денсаулығына жауапкершілікпен қарауға шақырды.
