ADYM.KZ / Солтүстік Қазақстан облысында құрылтай сайлауына дайындық аясында 543 сайлау учаскесі жұмыс істейді. Бұл туралы облыстық сайлау комиссиясы хабарлады.
Комиссияның мәліметінше, өңірдегі сайлау учаскелерінің 92-сі Петропавл қаласында орналасқан. Сондай-ақ әскери бөлімдерде, медициналық ұйымдарда және азаматтардың уақытша болатын орындарында 13 жабық сайлау учаскесі ашылады.
Сайлау науқаны кезінде облыста барлығы 558 сайлау комиссиясы қызмет атқарады. Оның ішінде 15 аумақтық және 543 учаскелік сайлау комиссиясы бар. Науқанға жалпы саны 3 196 комиссия мүшесі жұмылдырылады.
Сайлаушылардың нақты саны әзірге анықталған жоқ. Қолданыстағы заңнамаға сәйкес, дауыс беруге 20 күн қалғанда, яғни 2 тамызда әкімдер қол қойған сайлаушылар тізімі учаскелік сайлау комиссияларына беріледі. Осы күні өңірдегі сайлаушылардың нақты саны белгілі болады.
Ал 7 тамыздан бастап азаматтар өздерінің сайлаушылар тізіміне енгізілгені туралы мәліметпен таныса алады. Ол үшін тіркелген сайлау учаскесіне барып, жеке деректерінің дұрыстығын тексеруге мүмкіндік беріледі.
