ADYM.KZ / Астанада баяншылар мен аккордеоншылардың «Coupe Mondiale 79» халықаралық байқауы мәресіне жетті. Әлемнің 16 елінен келген 153 өнерпаз бақ сынаған байқауда қазақстандық музыканттар жоғары нәтиже көрсетіп, бірнеше жүлдеге ие болды.
Байқаудың негізгі аталымында Қазақстан атынан өнер көрсеткен Жандос Сауыт жеңімпаз атанды. Сонымен қатар қазақстандық Scythians триосы «Әлемдік музыка ансамблі» аталымында бірінші орын иеленіп, ел қоржынына тағы бір ірі жүлде салды.
Халықаралық өнер додасына Қазақстан атынан 40 өнерпаз қатысты. Жалпы байқаудың жүлде қоры 16 млн теңгені құрады.
Байқау қорытындысы бойынша жеті аталымның жеңімпаздары анықталды. «Классикалық музыка ансамблі» аталымында ресейлік Siberian Bayan Quartet ұжымы үздік деп танылды.
Ал «Жасөспірімдер арасындағы виртуоздық эстрадалық орындаушылық» аталымында Италия өкілі Давиде Ди Джакомо жеңіске жетсе, «Жасөспірімдер арасындағы Coupe Mondiale» аталымында Жапониядан келген Фута Мидзутани топ жарды.
«Ересектер арасындағы виртуоздық эстрадалық орындаушылық» аталымында Босния және Герцеговина өкілі Джордже Перич бірінші орын алды. Ал «Coupe Mondiale шеберлері» аталымының жеңімпазы ресейлік Тимур Сетраков болды.
Жеңімпаздарға арнайы жүлделерді Халықаралық аккордеоншылар конфедерациясының президенті Мирко Патарини табыстады.
Қорытынды концертте байқаудың жеті аталымы бойынша үздік танылған өнерпаздар сахнаға шықты. Көрермендерге ұлттық музыка мен әлемдік классика туындылары ұсынылды. Жеңімпаздармен бірге «Қазақконцерттің» әртістері мен шығармашылық ұжымдары өнер көрсетті.
Кештің ерекше сәттерінің бірі – 40-тан астам баяншының Құрманғазының әйгілі «Адай» күйін бірге орындауы болды. Ал салтанатты концерт Ескендір Хасанғалиевтің «Атамекен» әнімен қорытындыланды.
«Coupe Mondiale 79» тек байқаумен шектелген жоқ. Іс-шара аясында шығармашылық кездесулер, жеке концерттер мен шеберлік сабақтары ұйымдастырылды. 2021 жылғы «Coupe Mondiale» байқауының жеңімпазы Олжас Нұрланов жеке концертін ұсынып, Қазақстан мен шетелден келген белгілі музыканттар жас өнерпаздармен тәжірибе бөлісті.
Халықаралық байқауға барлығы 147 өтінім түскен. Оның 126-сы жеке орындаушылардан, 21-і ансамбльдерден қабылданған. Сонымен қатар Астанаға Халықаралық аккордеоншылар конфедерациясының 46 делегаты келді.
Байқауға қатысушылар кәсіби тәжірибе алмасып, әлемнің түрлі орындаушылық мектептерінің ерекшеліктерімен танысуға мүмкіндік алды. Ал қазақстандық өнерпаздардың жеңісі отандық баян және аккордеон мектебінің халықаралық деңгейдегі әлеуетін тағы бір мәрте көрсетті.
