ADYM.KZ / Қазақстан мен Марокко арасындағы экономикалық ынтымақтастық жаңа деңгейге көтерілді. Марокко Кәсіпорындарының жалпы конфедерациясы (CGEM) штаб-пәтерінде екі ел тарихындағы алғашқы Қазақстан–Марокко Іскерлік кеңесінің отырысы өтті. Бұл туралы ҚР Сыртқы істер министрлігінің баспасөз қызметі хабарлады.
Іс-шараға ҚР Сыртқы істер министрінің орынбасары Әлібек Қуантыров, CGEM президенті Мехди Тази, Қазақстанның Мароккодағы Елшісі Саулекүл Сайлауқызы, Іскерлік кеңестің тең төрағалары Дрис Беномар мен Мұрат Кәрімсақов, сондай-ақ екі елдің мемлекеттік органдары, даму институттары мен түрлі салалардағы компаниялардың өкілдері қатысты.
Жиын аясында Әлібек Қуантыров пен Мехди Тази жеке кездесу өткізіп, іскерлік қауымдастықтар арасындағы тікелей байланыстарды нығайту және бірлескен жобаларды жүзеге асыру мәселелерін талқылады.
Отырысты ашқан Әлібек Қуантыров соңғы жылдары Қазақстан мен Марокко арасындағы байланыстардың қарқынды дамып келе жатқанын атап өтті. Оның айтуынша, бес жыл бұрын Қазақстанның Мароккодағы Елшілігінің ашылуы екіжақты ынтымақтастыққа серпін берсе, өткен жылы Қазақстан Сыртқы істер министрінің және Мәжіліс Төрағасының Мароккоға жасаған сапарлары бұл бағыттағы жұмысты жандандырды.
Министрдің орынбасары жаңадан құрылған Іскерлік кеңес екі ел кәсіпкерлері үшін тиімді диалог алаңына айналып, инвестиция тартуға, өнеркәсіптік кооперацияны дамытуға және өзара сауданы кеңейтуге ықпал ететініне сенім білдірді.
Кездесу барысында тараптар ауыл шаруашылығы, өнеркәсіп, логистика, финтех және инвестициялар салаларындағы ынтымақтастық мүмкіндіктерін талқылады. Бұл бағыттар бойынша арнайы жұмыс топтары құрылып, бірлескен жұмысты жалғастыру туралы келісімге келді.
Сонымен қатар, қазақстандық және марокколық компаниялар өздерінің инвестициялық және экспорттық әлеуетін таныстырып, әріптестік мүмкіндіктерін қарастырды. Келіссөздерді жалғастыру үшін тараптар іскерлік байланыстар орнатты.
Іс-шара аясында қазақстандық өнімдердің көрмесі ұйымдастырылып, марокколық кәсіпкерлер отандық өндірушілердің өнімдерімен танысып, сауда байланыстарын кеңейту мүмкіндіктерін бағалады.
CGEM президенті Мехди Тази Марокконың Африка, Еуропа және араб әлемі арасындағы стратегиялық орналасуына назар аударып, елдің Африка мен Еуропа нарығына шығатын маңызды қақпа екенін айтты. Оның пікірінше, Қазақстан Орталық Азия нарығына жол ашатын сенімді серіктес бола алады.
Мехди Тази тыңайтқыш өндірісі, ауыл шаруашылығы, логистика, инфрақұрылым, энергетика, цифрлық технологиялар және жасанды интеллект салаларын екіжақты ынтымақтастықтың басым бағыттары ретінде атады. Оның айтуынша, Қазақстан–Марокко Іскерлік кеңесінің құрылуы CGEM-нің Орталық Азия елдерімен әріптестікті кеңейту стратегиясына толық сәйкес келеді.
Кездесу қорытындысында тараптар Іскерлік кеңесті екі елдің бизнес қауымдастықтары арасындағы тұрақты диалог алаңы ретінде дамытуға ниетті екенін растады. Бұл бастама Қазақстан мен Марокко арасындағы сауда-экономикалық және инвестициялық байланыстарды нығайтуға жаңа серпін береді.
