ADYM.KZ / Қаламыздың тарихы мен шежіресін жастарға таныстыруға бағытталған «Сіз тұратын көше» танымдық айдары аясында шаһардың күретамырына айналған Бауыржан Момышұлы атындағы көше туралы арнайы бейнеролик жарық көрді. Жаңа бейнематериалда көшенің қалыптасу тарихы мен бүгінгі қайнаған тіршілігі ғана емес, даңқты қолбасшы, Кеңес Одағының Батыры Бауыржан Момышұлының заң мен тәртіпке үндейтін өшпес мұрасы кеңінен көрініс тапқан.
Бүгінгі таңда қоғамда құқықтық мәдениетті қалыптастыру, жастарды заң талаптарын құрметтеуге тәрбиелеу аса маңызды. Жоба авторлары бұл бейнеролик арқылы қала жастарын жалаң патриотизмге емес, нақты іс-әрекетке, темірдей тәртіпке шақыруды мақсат еткен. Видеода батырдың «Тәртіпке бағынған құл болмайды, тәртіпсіз ел болмайды» және «Ерлік — табиғат сыйы емес, тәртіптің, тәрбиенің жемісі» деген қанатты сөздері айрықша назарға алынған. Бұл сөздер қазіргі «Заң мен тәртіп» қағидасымен үндесіп, жастардың санасында жауапкершілік сезімін оятуға, қоғамдық тәртіпті қатаң сақтауға, кез келген құқықбұзушылықтан аулақ болуға бағыт-бағдар береді.
Мұндай танымдық жобалар жастардың туған қаласына деген сүйіспеншілігін арттырып қана қоймай, ішкі мәдениетін қалыптастыруға үлкен серпін беруде. Бейнероликті тамашалаған қала жастары өз пікірлерімен бөлісті:
«Күнделікті осы көшемен оқуға, жұмысқа барамыз, бірақ батырдың атындағы көше бізге қандай жауапкершілік жүктейтінін ойлана бермейді екенбіз. Бейнероликтегі Бауыржан атамыздың «Тәртіпке бағынған құл болмайды» деген сөзі маған қатты әсер етті. Шынында да, заңды сыйлау, қоғамдық орындарда тәртіп сақтау, вандализмге жол бермеу — әрбір жастың азаматтық парызы. Бұл бейнеролик бізді тек тарихты білуге емес, заңға бағынатын саналы азамат болуға шақырады», — дейді студент Жандос Қамбаров.
Ал жас маман Аруна жобаның тәрбиелік маңызына тоқталды: «Қазіргі жастар ақпаратты визуалды түрде тез қабылдайды. Тарихты, оның ішінде батырдың тәртіпке қатысты қағидаларын бейнеролик арқылы ұсыну өте ұтымды шешім. Бауыржан Момышұлындай тұлғаның атындағы көшемен жүру — мақтаныш қана емес, үлкен жауапкершілік. Оның темірдей тәртібі бүгінгі қоғамдағы заң үстемдігін орнатуға негіз бола алады».
«Сіз тұратын көше» айдары қала тұрғындарына шаһардың әр бұрышындағы жасырын тарихты ашып, қоғамдық құндылықтарды насихаттауды жалғастырады. Заң мен тәртіпті ту еткен жаңа бейнеролик қазірдің өзінде әлеуметтік желілерде кеңінен таралып, көрермендердің ыстық ықыласына бөленуде.
