ADYM.KZ / Қазақстан мен Моңғолия арасындағы сауда көлемін 500 миллион долларға дейін жеткізу көзделіп отыр. Бұл мәселе Қытайдың Далянь қаласында өткен Дүниежүзілік экономикалық форумның («Жазғы Давос») 17-ші жыл сайынғы кездесуінде талқыланды.
Форум аясында Қазақстан Премьер-министрі Олжас Бектенов Моңғолия Премьер-министрі Ням-Осорын Учралмен кездесті. Тараптар сауда-экономикалық ынтымақтастықты кеңейту, өнеркәсіп кооперациясы, тау-кен металлургиясы, көлік-логистика, агроөнеркәсіп, цифрландыру, жасанды интеллект және ғарыш технологиялары салаларындағы өзара іс-қимылды дамыту мәселелерін қарастырды.
Келіссөз барысында Моңғолия Президенті Ухнаагийн Хурэлсухтың биыл сәуірде Қазақстанға жасаған мемлекеттік сапары кезінде қол жеткізілген келісімдердің орындалу барысы сөз болды. Сондай-ақ екі ел басшылары қойған өзара сауда көлемін 500 миллион долларға жеткізу міндетін жүзеге асыру жолдары талқыланды.
Кездесу қорытындысында тараптар экономиканың барлық басым бағыттары бойынша ынтымақтастықты одан әрі нығайтуға дайын екенін мәлімдеді.
Олжас Бектенов форум аясында Бангладеш Халық Республикасының Премьер-министрі Тарик Рахманмен де кездесті. Тараптар сауда, инвестиция, көлік-логистика және цифрландыру салаларындағы әріптестікті дамыту мәселелеріне назар аударды.
Қазақстан Премьер-министрі Президент Қасым-Жомарт Тоқаевтың бастамасымен жүзеге асырылып жатқан реформалар елдің инвестициялық тартымдылығын арттырып, халықаралық ынтымақтастықты кеңейтуге мүмкіндік беріп отырғанын атап өтті. Нәтижесінде тараптар қазақ-бангладеш қарым-қатынасын тереңдетуге және бірлескен жаңа жобаларды іске асыруға мүдделі екенін растады.
Сонымен қатар, Олжас Бектенов Дүниежүзілік экономикалық форумның президенті әрі бас директоры Алоис Цвингимен келіссөз жүргізді. Кездесу барысында цифрлық трансформация, жасанды интеллект, инвестиция тарту және адами капиталды дамыту бағыттарындағы ынтымақтастық перспективалары талқыланды.
Үкімет басшысы Қазақстанның форуммен жүйелі сараптамалық әріптестік орнатуға мүдделі екенін жеткізді. Сондай-ақ «Бәйтерек» холдингі арқылы бірлескен инвестициялық жобаларды жүзеге асыру мүмкіндіктері қарастырылды.
Бүгінде Қазақстанда инвесторлар үшін қолайлы жағдай жасауға бағытталған кешенді жұмыстар жүргізілуде. Елде мемлекеттік қолдау тетіктері кеңейтіліп, Altyn Visa арнайы визалық режимі енгізілуде. Бұдан бөлек, салықтық және кедендік жеңілдіктер қарастырылып, жобаларды сүйемелдеу «бір терезе» қағидаты бойынша жүзеге асырылуда.
