ADYM.KZ / «Әділет» партиясының төрағасы Айбек Дәдебай партия жанынан Іскерлік кеңес құрылғанын көлік-логистика саласының өкілдерімен өткен кездесуде мәлімдеді. Басқосуға орталық мемлекеттік органдардың, ірі компаниялар мен салалық қауымдастықтардың басшылары қатысты.
Кездесудің негізгі тақырыбы Мемлекет басшысы экономикалық өсімнің басым бағыттарының бірі ретінде айқындаған көлік-логистика саласын дамыту мәселелері болды.
Айбек Дәдебайдың айтуынша, экономиканың тұрақты дамуы мемлекет, бизнес және сарапшылар қауымдастығы арасындағы тұрақты әріптестікке тікелей байланысты. Осы мақсатта құрылған Іскерлік кеңес кәсіпкерлер мен мемлекеттік органдар арасындағы тиімді диалогты қамтамасыз ететін және ортақ шешімдер әзірлейтін тұрақты алаңға айналады.
«Бизнес – ұлттық экономиканың басты қозғаушы күші. Кәсіпкерлер жаңа өндірістер ашып, жұмыс орындарын құрады, бюджет кірісін арттырады. Соның нәтижесінде әлеуметтік инфрақұрылым дамып, өңірлердің тұрақты өсіміне негіз қаланады», – деді партия төрағасы.
Оның айтуынша, Қазақстан бүгінде Еуразиядағы ірі көлік-транзиттік хабтардың бірі ретінде өз позициясын нығайтып келеді. Былтыр сала 20,4 пайызға өсіп, жалпы ішкі өнімдегі үлесі 6,1 пайызға жеткен. Ал транзиттік жүк тасымалының көлемі 39 миллион тоннадан асты.
Айбек Дәдебай көлік пен логистика енді тек инфрақұрылым ғана емес, экономиканың жеке табыс әкелетін, жаңа жұмыс орындарын құратын және экспортты ұлғайтатын маңызды саласына айналып келе жатқанын атап өтті.
Кездесу барысында теміржол тарифтерін қалыптастыру, инвестиция тарту, халықаралық автомобиль тасымалдарын дамыту, жүк авиациясының әлеуетін арттыру және саланы цифрландыру мәселелері талқыланды. Сондай-ақ мемлекет пен бизнес арасындағы өзара іс-қимылдың тиімді моделін қалыптастыруға ерекше назар аударылды.
«Қазақстан Автокөлікшілер одағы» ЗТБ атқарушы директоры Мұрат Амрин көлік саласы «Әділет» партиясымен тұрақты диалог орнатуға және заңнамалық бастамаларды бірлесіп әзірлеуге мүдделі екенін жеткізді.
«Көлік бизнесі әділдікке, ашық диалогқа және кәсіпкерлердің нақты мәселелерін шешуге бағытталған тәсілді қолдайды. Мұндай өзара іс-қимыл саланы дамытуға арналған тиімді ұсыныстар әзірлеуге мүмкіндік береді», – деді ол.
Партия төрағасы бизнестің басты құндылығы – кәсіпорындарда еңбек ететін адамдар екенін атап өтіп, мемлекет инфрақұрылымды дамытып, қолайлы ережелер қалыптастыруы тиіс болса, бизнес инвестиция салып, қызмет сапасы мен бәсекеге қабілеттілікті қамтамасыз етуі қажет екенін айтты.
Іскерлік кеңестің тұрақты жұмысын қамтамасыз ету үшін экономиканың түрлі салаларын қамтитын жеті тең төраға бекітілді. Олардың қатарында Андрей Лаврентьев, Бағдат Мусин, Геннадий Зенченко, Рустам Жүрсінов, Айжан Балакешова, Инна Апенко және Шахмұрат Мүтәліп бар.
Кездесу қорытындысында Айбек Дәдебай Іскерлік кеңестің тұрақты жұмыс істейтін алаңға айналатынын атап өтті. Кеңес аясында кәсіпкерлікті қолдау, экономиканың түрлі секторларын дамыту және мемлекет пен бизнес арасындағы әріптестікті күшейтуге бағытталған бастамалар әзірленетін болады.
