ADYM.KZ / Қазақстан мен Біріккен Ұлттар Ұйымы қылмыстың жаңа түрлері мен трансұлттық қауіп-қатерлерге қарсы іс-қимыл бойынша ынтымақтастықты одан әрі нығайтпақ. Бұл мәселе Қазақстан Республикасы Бас прокурорының орынбасары Асхат Жұмағалидің БҰҰ-ның Есірткі және қылмыс жөніндегі басқармасының (БҰҰ ЕҚБ) өңірлік өкілі Оливер Штольпемен кездесуінде талқыланды.
Кездесуде тараптар 2017 жылдан бері Қазақстанның Бас прокуратурасы мен БҰҰ ЕҚБ арасында Меморандум аясында жүзеге асырылып келе жатқан әріптестіктің нәтижелерін атап өтті. Осы кезеңде терроризм мен экстремизмге, есірткінің заңсыз айналымына, адам саудасына, қылмыстық кірістерді жылыстатуға және киберқылмысқа қарсы іс-қимыл бағыттарында өзара тәжірибе алмасу жолға қойылған.
Ынтымақтастық аясында Бас прокуратура жанындағы Құқық қорғау органдары академиясының базасында Орталық Азиядағы жаһандық қауіп-қатерлерге қарсы іс-қимыл жөніндегі Өңірлік хаб құрылды.
БҰҰ ЕҚБ қолдауымен осы уақытқа дейін 150-ден астам оқу іс-шарасы өткізілген. Оларға ТМД елдерінің 4,5 мыңнан астам құқық қорғау органдарының қызметкері қатысып, біліктілігін арттырды.
Кездесуде Бас прокуратура жанындағы Құқықтық статистика және арнайы есепке алу комитетінің базасында жұмыс істейтін Таргетинг-орталығының қызметіне де ерекше назар аударылды. Орталық есірткі, прекурсорлар мен жаңа психобелсенді заттардың заңсыз айналымына, сондай-ақ олармен байланысты трансұлттық қауіп-қатерлерге қарсы іс-қимылға бағытталған.
Сонымен қатар тараптар киберқылмыстың, соның ішінде интернет-алаяқтық пен интернет-наркобизнестің таралуына байланысты қауіптерді талқылады. Бұл бағытта қылмыстық тәуекелдерді ерте анықтау және алдын алу үшін цифрлық технологиялар мен жасанды интеллект мүмкіндіктерін тиімді пайдалану мәселесі көтерілді.
Бас прокуратураның Қылмыстық қауіп-қатерлерді болжау орталығының жасанды интеллект арқылы қылмыстық тәуекелдерді ерте анықтау және алдын алу әлеуетін пайдалану жөнінде уағдаластыққа қол жеткізілді.
Сондай-ақ құқық қорғау органдары қызметкерлерінің цифрлық технологиялар саласындағы кәсіби дағдыларын жетілдіру қажеттігі атап өтілді. Атап айтқанда, цифрлық дәлелдемелермен, криптоактивтермен және заманауи талдау құралдарымен жұмыс істеу дағдыларын дамыту көзделіп отыр.
Осыған байланысты тараптар Құқық қорғау органдары академиясының базасында мамандарды даярлауға арналған бірлескен ведомствоаралық оқу-талдау орталығын құру мүмкіндігін пысықтауға келісті.
Кездесу қорытындысы бойынша Қазақстан мен БҰҰ өзара қызығушылық тудыратын бағыттардың барлығында ынтымақтастықты одан әрі дамытуға және бірлескен жұмыстың жаңа тетіктерін қалыптастыруға уағдаласты.
