ADYM.KZ / Қазақстан құрамасы Жапонияның астанасы Токиода өткен шинкиокушинкай каратэден «Чемпиондардың чемпионы TOP-9» халықаралық турнирінде екі жүлде жеңіп алды.
Ерлер арасындағы жарыста қазақстандық Анджей Кинзерский барлық қарсыласын жеңіп, чемпион атанды. Ол жартылай финалда литвалық Энтас Хаускасты 5:0 есебімен ұтса, финалда тағы бір қазақстандық Антон Зимаревтен басым түсіп, алтын медальға ие болды.
Өз кезегінде Антон Зимарев жартылай финалда литвалық Паулюс Зимантасты жеңіп, финалға жолдама алған еді. Нәтижесінде ол турнирдің күміс жүлдесін иеленді.
Биылғы жарыста алғаш рет екі шетелдік спортшы финалда кездесіп, тарихи нәтиже тіркелді. Турнир жеңімпазы Анджей Кинзерскийге 10 миллион жапон иені көлемінде бас жүлде табысталса, екінші орын алған Антон Зимарев 2 миллион иен сыйақы алды.
Айта кетейік, «Чемпиондардың чемпионы TOP-9» турниріне ерлер арасында әлемнің үздік тоғыз, ал әйелдер арасында үздік сегіз каратэшісі қатысты.
Бұған дейін Анджей Кинзерский Жапонияның жалпыұлттық чемпионатында топ жарып, бұл жетістікке жеткен алғашқы шетелдік спортшы ретінде тарихқа енген болатын.
