ADYM.KZ / Ақмола облысының Щучинск қаласында ересектер арасында қоян-қолтық ұрыстан Қазақстан Республикасының кубогы өтті. Жарысқа еліміздің әр өңірінен келген мықты спортшылар қатысып, жекпе-жек техникасы, дене дайындығы мен төзімділіктерін сынады.
25-28 тамыз аралығында өткен бәсекеде Қазақстан Республикасы ІІМ Ұлттық ұланының «Burkit Team» спорт командасының өкілі, 6654 әскери бөлімінің офицері, капитан Қымбат Ахмет жоғары нәтиже көрсетті.
Әскери қызметші жарыстың екі бағдарламасында да қарсыластарынан басым түсіп, екі алтын медальға қол жеткізді. Атап айтқанда, жекпе-жек бөлімінде 53 келіге дейінгі салмақ дәрежесінде жеңіске жетіп, Қазақстан кубогының чемпионы атанды.
Сонымен қатар ол 50 келіге дейінгі салмақтағы «Өзін-өзі қорғау» бағдарламасында да үздік нәтиже көрсетіп, бірінші орын иеленді.
Қымбат Ахметтің бұл жетістігі Ұлттық ұланның жауынгерлік даярлығымен қатар, әскери қызметшілердің спорттық әлеуетінің де жоғары екенін көрсетті.
Республикалық деңгейдегі жарыста екі алтын медаль иеленген капитан Қымбат Ахмет Ұлттық ұланның спорттық жетістіктерінің қатарын толықтырды.
