ADYM.KZ / Қытайдың Ханчжоу қаласындағы Чжэцзян провинциялық музейінде Қазақстан Республикасы Ұлттық музейінің «Ұлы дала көшпелілерінің мәдениеті» атты халықаралық көрмесінің салтанатты ашылуы өтті. Бұл туралы ҚР Мәдениет және ақпарат министрлігінің баспасөз қызметі хабарлады.
Көрмеде Қазақстан аумағын мекендеген ежелгі және ортағасырлық көшпелі халықтардың тарихы мен мәдениетін таныстыратын 279 бірегей археологиялық жәдігер көпшілік назарына ұсынылған.
Ашылу рәсіміне Қазақстанның Шанхайдағы Бас консулы Нұрлан Аққошқаров, Бейжіңдегі Қазақ мәдени орталығының өкілдері, ҚР Ұлттық музейінің басшылығы, Қытай музейлерінің директорлары, ғалымдар, археологтар мен мәдениеттанушылар қатысты.
Экспозиция үш тақырыптық бөлімнен тұрады. Онда қола дәуірінен бастап орта ғасырға дейінгі кезеңді қамтитын зергерлік бұйымдар, қару-жарақ, еңбек құралдары, керамика, торевтика және көне мата үлгілері қойылған. Сондай-ақ сақ, үйсін, ғұн, қаңлы және түркі тайпаларының мәдени мұрасы мен Ұлы Жібек жолы бойындағы қалалардың даму тарихы таныстырылады.
Көрменің басты экспонаттарының қатарында Есік қорғанынан табылған «Алтын адамның» реконструкциясы, Қаңлы мемлекетінің ақсүйек әйелі мен ғұн жауынгерінің бейнелері бар. Бұдан бөлек, Шілікті қорғанынан, Жалаулы және Қарғалы қазыналарынан табылған алтын бұйымдар, Арыс өзені аңғары мен Күлтөбе қалашығынан алынған археологиялық олжалар, XIII–XIV ғасырларға жататын жібек маталардың бөліктері де көрермен назарына ұсынылған.
Көрменің ашылуы аясында Қазақстан Республикасы Ұлттық музейі мен Чжэцзян провинциялық музейі арасында ынтымақтастық туралы меморандумға қол қойылды. Құжат бірлескен ғылыми зерттеулер жүргізуді, Ұлы Жібек жолының тарихи ескерткіштерін зерделеуді, тәжірибе алмасуды және археологиялық экспедициялар ұйымдастыруды көздейді.
Жоба Қазақстан мен Қытай арасындағы мәдени ынтымақтастық аясында және екі ел арасындағы дипломатиялық қатынастардың 35 жылдығына орай ұйымдастырылды.
«Ұлы дала көшпелілерінің мәдениеті» көрмесі Чжэцзян провинциялық музейінде 2026 жылдың 11 қазанына дейін жалғасады.
