ADYM.KZ / Шымкент қаласындағы «Астана» алаңы Республика күні қарсаңында ерекше мерекелік рухқа бөленді. Ұлттық мерекеге арналған ауқымды халықтық іс-шараға қала тұрғындары мен қонақтары жиналып, елдік пен бірлікті, ұлттық құндылықтар мен отансүйгіштік рухты дәріптейтін мерекелік кештің куәсі болды.
Мерекелік концерттік бағдарламада жергілікті шығармашылық ұжымдармен қатар, елімізге танымал өнер жұлдыздары өнер көрсетті. Атап айтқанда, Маржан Арапбаева, Қайрат Түнтеков, Әділет Жауғашар, Сырым Исабаев, Заттыбек Көпбосынұлы және Еркеш Хасен сахнаға шығып, көрермендерге көтеріңкі көңіл күй сыйлады. Әншілердің орындауындағы танымал әндер мен әсерлі музыкалық нөмірлер мерекелік кештің мазмұнын байытып, алаңға жиналған жұртшылықтың ықыласына бөленді.
Концерт барысында ұлттық мерекенің маңызы айшықталып, Қазақстанның жетістіктері мен ел болашағына деген сенім көрініс тапты. Әсем әндер мен жарқын өнер көрсетілімдері көрермендерге ерекше әсер қалдырып, мерекелік көңіл күйді одан әрі асқақтатты. Қала тұрғындары мен қонақтары отбасыларымен бірге келіп, мерекелік бағдарламаны тамашалап, ортақ қуанышқа бөленді.
Шымкент қаласының әкімдігі ұйымдастырған іс-шараның басты мақсаты – ел егемендігі мен тәуелсіздігін дәріптеу, ұлттық бірлік пен отансүйгіштік құндылықтарды нығайту, сондай-ақ тұрғындарға мерекелік көңіл күй сыйлау.
Республика күні – Қазақстанның мемлекеттілік тарихындағы маңызды белестерді еске алып, егемендіктің қадір-қасиетін терең түсінуге мүмкіндік беретін айрықша мереке. 1990 жылғы 25 қазанда Мемлекеттік егемендік туралы декларацияның қабылдануы еліміздің тәуелсіздікке қарай жасаған тарихи қадамы болды. Бүгінде бұл күн ұлттық бірегейлікті нығайтып, елдік мұраттар төңірегінде қоғамды топтастыратын маңызды датаға айналды.
Шымкенттегі мерекелік концерт осы тарихи күннің мәні мен рухын айшықтап, тұрғындардың ортақ құндылықтарға деген құрметін арттыра түсті.
Мерекелік бағдарлама ертең де «Астана» алаңында жалғасады. Кештің соңы қала тұрғындары мен қонақтарына арналған жарқын отшашумен қорытындыланады.
