ADYM.KZ / Петропавл қаласында ҚР Президенті Телерадиокешенінің 30 жылдығына арналған «Хроникадан болашаққа» республикалық кинолекторийі өтті. Екі күнге созылған ағартушылық жоба аясында көрермендерге Қазақстан тарихындағы маңызды кезеңдер, азаматтық жауапкершілік және ел дамуына үлес қосқан тұлғалардың тағдыры туралы деректі фильмдер ұсынылды.
Президент Телерадиокешенінің Деректі кино орталығы ұйымдастырған жоба еліміздің солтүстік өңірлерінде де үлкен қызығушылыққа ие болды. Петропавл тұрғындарына көрсетілген туындылар қоғамдағы өзекті мәселелерді, тарихи оқиғаларды және қарапайым адамдардың өмір жолын жаңа қырынан таныстырды.
Солтүстік Қазақстан облысы мәдениет, тілдерді дамыту және архив ісі басқармасы басшысының міндетін атқарушы Динара Бүркітәлімова кинолекторийдің өңір үшін маңызын атап өтті.
— Бұл жоба қазақстандықтар үшін өте маңызды. Ол көрермендерді еліміздің тарихымен, мәдениетімен және жетістіктерімен таныстырып, тарихи жадыны сақтауға әрі патриоттық құндылықтарды нығайтуға ықпал етеді. Президент Телерадиокешені — Тәуелсіз Қазақстанның шежіресін жасап келе жатқан бірегей шығармашылық орталық, — деді ол.
Кинолекторий барысында көрермен назарына «Қуатты серіктес», «Құлалы аралының адамы», «Travel Kazakhstan» және «Апорт» фильмдері ұсынылды.
Фильмдерде Қазақстанның сыртқы саясаты, ел тарихындағы маңызды оқиғалар, табиғи және мәдени мұра, сондай-ақ түрлі салада еңбек етіп жүрген азаматтардың тағдыры баяндалады. Куәгерлердің сұхбаттары арқылы берілген оқиғалар көрерменге жақын әрі түсінікті форматта ұсынылды.
«Қуатты серіктес» фильмі Қазақстан мен Жапония арасындағы стратегиялық әріптестіктің дамуына арналса, «Апорт» туындысында ұлттық мақтанышқа айналған жемістің тарихы мен оны қайта жаңғырту жұмыстары көрсетілген.
Петропавл тұрғыны Айтбек Еслямбекұлы «Апорт» фильмінен ерекше әсер алғанын айтты. Оның сөзінше, бұл жеміс көптеген қазақстандықтың балалық және жастық шағымен байланысты.
— Апорттың қайталанбас дәмі әлі күнге дейін есімде. Бұл — біздің ұлттық мақтанышымыз. Фильмнен оны сақтап қалу және қайта дамыту бағытында ауқымды жұмыстар жүргізіліп жатқанын білдім, — деді ол.
Бағдарламадағы тағы бір ерекше туынды — Каспий теңізіндегі Құлалы аралында орналасқан гидрометеорологиялық станция басшысы Петр Лупенковтың өмірі мен еңбегін баяндайтын «Құлалы аралының адамы» фильмі болды.
Көрсетілімнен кейін көрермендер фильмдердің түсірілу барысы, шығармашылық шешімдер мен кейіпкерлермен жұмыс істеу ерекшеліктері туралы сұрақтарын қойды. Оларға Президент Телерадиокешенінің Деректі фильмдер орталығының аға редакторы, сценарист Эльмира Ішмұхаметова және режиссер Бахтияр Канафин жауап берді.
Эльмира Ішмұхаметова көрермендердің деректі фильмдерге қызығушылығы шығармашылық топ үшін үлкен баға екенін атап өтті.
— Көрермендерді көбіне кадр сыртында қалған дүниелер қызықтырады. Олар түсірілім барысы, кейіпкерлермен жұмыс істеу жайын сұрайды. Біз әр фильм арқылы еліміздің құндылықтарын, адамдардың еңбегін және өмірлік ұстанымдарын көрсетуге тырысамыз, — деді ол.
«Хроникадан болашаққа» жобасы ел тарихын, мәдени мұраны және замандастар тағдырын деректі кино тілі арқылы таныстырып, көрермендерге өткенді бағалап, болашаққа көз жүгіртуге мүмкіндік берді.
