ADYM.KZ / 2026-2027 оқу жылынан бастап қазақстандық мектептерде бірқатар маңызды өзгерістер күшіне енеді. Президент Қасым-Жомарт Тоқаев педагог мәртебесі, білім беру, денсаулық сақтау және бала құқықтарын қорғау мәселелеріне қатысты заңға қол қойды.
Заң ресми жарияланған күннен кейін 60 күн өткен соң күшіне енеді. Соған сәйкес жаңа нормалардың басым бөлігі алдағы оқу жылында қолданыла бастайды.
Жаңа өзгерістердің бірі – мұғалімдердің жауапкершілік шегін нақтылау. Енді педагогтер мен білім беру ұйымдарының басшылары оқушылармен болған оқыс оқиғалар үшін тек кәсіби қызметін атқару кезеңінде және қызметтік міндеттерін орындау барысында ғана жауап береді.
Сонымен қатар мектептерде ұялы телефон қолданудың бірыңғай тәртібі енгізіледі. Білім саласындағы уәкілетті орган оқушылардың мобильді құрылғыларды пайдалану қағидаларын әзірлеп, бекітеді. Оның нақты тетіктері кейін жеке құжатта айқындалады.
Заң аясында ата-аналардың жауапкершілігі де кеңейтілді. Бұған дейін олар баланың тәрбиесі мен дамуына жауапты болса, енді баланың өмірі, денсаулығы және қауіпсіздігі үшін де тікелей жауап береді.
Сондай-ақ оқушылардың міндеттері толықтырылды. Енді білім алушылар педагогтердің заңмен қорғалатын құқықтары мен заңды мүдделерін құрметтеуге міндетті болады. Бұл норма мұғалім мәртебесін нығайтып, мектептегі тәртіпті күшейтуге бағытталған.
Заңда олимпиада, ғылыми жоба, шығармашылық және кәсіби шеберлік байқауларының республикалық және өңірлік деңгейдегі жеңімпаздарын қолдау шаралары да қарастырылған. Мемлекет олардың халықаралық жарыстарға қатысуына қаржылық қолдау көрсетеді.
Осылайша жаңа заң білім беру жүйесіндегі жауапкершілік пен тәртіпті күшейтіп, дарынды оқушыларды қолдаудың қосымша тетіктерін енгізуді көздейді.
