ADYM.KZ / Қазақстанның энергетика саласында цифрлық технологияларды енгізу қарқын алып келеді. Цифрландыру жылы аясында Энергетика министрлігі энергетикалық инфрақұрылымның сенімділігін арттыру, өндірістік процестерді оңтайландыру және еңбек қауіпсіздігін күшейтуге бағытталған заманауи цифрлық шешімдерді іске асыруда.
Ведомствоның мәліметінше, жаңа технологиялар электр беру желілерін, трансформаторларды, түтін мұржаларын, көмір қоймаларын және гидротехникалық құрылыстарды автоматты түрде тексеруге мүмкіндік береді. Ал жасанды интеллект жиналған мәліметтерді талдап, ақауларды ерте кезеңде анықтап, оларды жоюға қатысты ұсынымдар әзірлейді.
Электр беру желілері мен энергетикалық нысандарды ұшқышсыз ұшу аппараттарының көмегімен тексеру инспекция жүргізу уақытын 5–10 есеге дейін қысқартқан. Бұрын түтін мұржаларын тексеруге бірнеше күн қажет болса, қазір бұл жұмыс шамамен екі сағатта аяқталады. Сонымен қатар, қызметкерлердің биіктікте жұмыс істеу қажеттілігі жойылып, еңбек қауіпсіздігі айтарлықтай жақсарған.
Цифрлық технологиялар көмір қорларын бақылауда да қолданылып жатыр. Аэрофототүсірілім негізінде қоймалардың үш өлшемді модельдері жасалып, жасанды интеллект көмір көлемін 99 пайызға дейінгі дәлдікпен автоматты түрде есептейді. Соның нәтижесінде деректерді өңдеу мерзімі бірнеше күннен небәрі 20 минутқа дейін қысқарған.
Бұдан бөлек, цифрлық құралдар гидротехникалық құрылыстарды бақылауда да тиімділігін көрсетуде. Аэрофототүсірілім мен тепловизиялық бақылау нәтижелерін талдау бөгеттердегі ықтимал ақауларды дер кезінде анықтап, технологиялық тәуекелдердің алдын алуға мүмкіндік береді.
Энергетика министрлігінің мәліметінше, жасанды интеллект пен цифрлық мониторинг жүйелерін енгізу энергетикалық инфрақұрылымның сенімділігін арттырып, өндірістік тиімділік пен өнеркәсіптік қауіпсіздік деңгейін жаңа сатыға көтеруге ықпал етеді. Бұл ведомствоның энергетика саласын цифрлық трансформациялау жөніндегі стратегиялық бағытының негізгі басымдықтарының бірі болып саналады.
Еске салсақ, биыл Қазақстанның энергетика жүйесіне жалпы қуаты 2,66 ГВт болатын жаңа энергетикалық нысандарды іске қосу жоспарланған.
