ADYM.KZ / «Әзірет Сұлтан» ұлттық тарихи-мәдени музей-қорығының Ясауитану ғылыми орталығының ғалымдары Ресей мемлекеттік кітапханасының қорынан XVII ғасырға жататын, Ясауи тариқатының тарихы мен рухани іліміне арналған сирек қолжазбаны анықтады.
Зерттеу жұмыстары Мемлекет басшысы Қасым-Жомарт Тоқаевтың Қожа Ахмет Ясауи мұрасын жан-жақты зерттеу және кеңінен насихаттау жөніндегі тапсырмасы, сондай-ақ Үкімет бекіткен Ясауитану саласын дамыту жоспары аясында жүргізіліп жатыр.
Мәскеуге ұйымдастырылған ғылыми экспедиция барысында табылған «Хужжат әз-Закирин ли-радд әл-Мункирин» («Зікірді терістеушілерге қарсы зікір етушілердің дәлелі») атты еңбек Бұхарада жазылған. Мамандардың айтуынша, бұл туынды Ясауи мектебінің тарихы мен рухани дәстүрін танытатын маңызды жазба дереккөздердің бірі саналады.
Қолжазбада сопылық ілім, жария зікір дәстүрі және рухани сабақтастық мәселелері кеңінен баяндалған. Сонымен қатар еңбекте Қожа Ахмет Ясауиден бастау алып, Хакім ата, Зеңгі ата және тариқаттың кейінгі өкілдеріне жалғасқан рухани шежіреге қатысты құнды мәліметтер қамтылған.
Қазір ғалымдар қолжазбаның ғылыми сипаттамасын әзірлеу үстінде. Алдағы кезеңде оның мәтіні белгілі нұсқалармен салыстырылып, мәтінтанулық сараптама жүргізіледі. Зерттеу қорытындылары ғылыми айналымға енгізіледі.
Еске салайық, бұған дейін Қожа Ахмет Ясауи мұрасына арналған екі кітап төрт тілде жарық көрген болатын.
