ADYM.KZ / Қазақстанда зейнеткерлер мен зейнет жасына жақындаған азаматтарға онлайн форматта несие рәсімдеуге тыйым салынды. Бұл туралы Ұлттық банк төрағасы Тимур Сүлейменов брифинг барысында мәлімдеді.
Оның айтуынша, жаңа талап қаржылық алаяқтықтың алдын алып, азаматтардың әлеуметтік тұрғыдан осал санатын қорғауға бағытталған.
«Егде жастағы азаматтар, әсіресе зейнеткерлер немесе зейнет жасына таяған адамдар несие алу үшін міндетті түрде банк бөлімшесіне жеке келуі тиіс. Бұл жағдайда жауапкершілік банк менеджеріне жүктеледі. Егер қызметкер клиенттің алаяқтардың ықпалында болуы мүмкін екенін байқаса, несиенің қандай мақсатта алынатынын нақтылайды. Ал егер клиентке белгісіз біреулер хабарласып, несие рәсімдеуді талап еткені анықталса, банк мұндай несиені бермеуге міндетті», – деді Тимур Сүлейменов.
Ұлттық банк төрағасының сөзінше, аталған талаптардың орындалуын Қаржы нарығын реттеу және дамыту агенттігі бақылайды. Агенттік банктерге жоспарлы тексерулер жүргізіп, жаңа ережелердің сақталуын қадағалайды.
Сондай-ақ 2027 жылғы 1 қаңтардан бастап Қазақстанда қарыз алушылардың төлем қабілетін бағалаудың жаңа тетігі енгізіледі. Осы күннен бастап банктер несие беру кезінде қарыздың табысқа арақатынасы коэффициентін (ҚТА) ескеруге міндетті болады. Бұл көрсеткіш азаматтардың борыштық жүктемесін тиімді бағалауға мүмкіндік береді.
