ADYM.KZ / Астанада 24 шілдеде алғаш рет аэротаксидің демонстрациялық ұшуы өтеді. Сынақ елордадағы «Қазанат» ипподромының аумағында ұйымдастырылады.
Демонстрациялық ұшуға тік көтеріліп, тік қона алатын электрлі әуе көлігі — eVTOL санатындағы AutoFlight Prosperity моделі пайдаланылады. Әуе көлігі бір ұшқыш пен бес жолаушыны тасымалдауға арналған. Оның ең жоғары жылдамдығы сағатына 200 шақырымға дейін жетсе, ұшу қашықтығы 200 шақырымға дейін барады.
Ұйымдастырушылардың мәліметінше, сынақ 24 шілде күні сағат 09:00-де басталады. Алайда ауа райы қолайсыз болған жағдайда демонстрациялық ұшудың күні мен уақыты өзгеруі мүмкін.
Еске салайық, Қазақстанда eVTOL әуе көлігінің алғашқы демонстрациялық ұшуы 2026 жылғы 19 мамырда Алматы облысындағы Алатау қаласында орналасқан еліміздегі алғашқы вертипорт аумағында өткен болатын.
Сондай-ақ биыл маусым айында Қазақстанда аэротакси, eVTOL және ұшқышсыз авиацияны дамытуға құқықтық негіз қалыптастыратын заң күшіне енді.
