ADYM.KZ / Маңғыстау облысында Шетпе теміржол вокзалы қайта жаңғыртудан кейін жолаушылар игілігіне берілді. Жаңартылған нысанның ашылу рәсіміне облыс әкімі Нұрдәулет Қилыбай, «Қазақстан темір жолы» ҰК» АҚ өкілдері және мердігер ұйым мамандары қатысты.
Жоба Мемлекет басшысы Қасым-Жомарт Тоқаевтың тапсырмасымен жүзеге асырылып жатқан еліміздегі 124 теміржол вокзалын жаңғырту жөніндегі мемлекеттік бағдарлама аясында іске асырылды.
1967 жылы салынған вокзал ғимараты толық жаңартылды. Қайта жаңғырту барысында ғимараттың қабырғалары қайта қаланып, шатыры мен қасбеті ауыстырылды. Сонымен қатар инженерлік желілер жаңартылып, ішкі әрлеу жұмыстары жүргізілді және вокзал маңы аумағы абаттандырылды.
Жоба аясында аумағы 2 100 шаршы метр болатын жаңа жолаушылар платформасы салынды. Платформа заманауи жабынмен қамтамасыз етіліп, мүмкіндігі шектеулі азаматтарға арналған тактильді жолақтар, навигациялық белгілер және басқа да қолайлы орта элементтері орнатылды.
Жаңартылған вокзал жаңа жиһаздармен және заманауи жабдықтармен жабдықталды. Құрылыс кезінде отандық өндіріс материалдары пайдаланылды.
Жөндеу жұмыстары нәтижесінде вокзал ғимаратының жалпы ауданы 201 шаршы метрден 1 103 шаршы метрге дейін ұлғайды. Яғни нысан аумағы бес еседен астам артты. Ал вокзалдың тәуліктік өткізу мүмкіндігі екі есеге көбейіп, 100 жолаушыдан 200 жолаушыға дейін жетті.
Жаңғыртылған нысан қауіпсіздік, энергия тиімділігі және кедергісіз орта талаптарына толық сәйкес келеді.
Бүгінде Шетпе станциясы арқылы Семей, Қарағанды, Маңғыстау, Ақтөбе, Атырау және Орал бағыттарына қатынайтын 16 жолаушылар пойызы жүреді.
Жаңартылған вокзал жолаушыларға көрсетілетін қызмет сапасын арттырып, тұрғындар мен өңір қонақтары үшін жайлы әрі қауіпсіз жағдай жасауға мүмкіндік береді.
