ADYM.KZ / Қазақстан цифрлық даму және жасанды интеллектіні енгізу бағытында айтарлықтай нәтижелерге қол жеткізіп, электрондық үкіметті дамыту бойынша әлемнің алдыңғы қатарлы елдерінің қатарына кірді.
Үкіметтің мәліметінше, OpenAI талдауына сәйкес, Қазақстан жасанды интеллектіні енгізу деңгейі жоғары мемлекеттер қатарынан орын алып, Орталық Азия елдері арасында көш бастап тұр.
Елде цифрландыру және жасанды интеллект саласын дамытуға бағытталған кешенді жұмыстар «Digital Qazaqstan» жалпыұлттық стратегиясы аясында жүзеге асырылуда. Стратегия 2029 жылға дейінгі кезеңді қамтып, экономиканың негізгі салаларына заманауи технологияларды енгізуді көздейді.
Мемлекеттік саясаттың негізгі бағыттарының бірі – GovTech 3.0 моделіне көшу, мемлекеттік қызметтерді толық цифрландыру, телекоммуникациялық инфрақұрылымды дамыту және IT саласын қолдау.
Қазақстанның цифрлық көрсеткіштері өсуде
Қазақстан БҰҰ-ның электрондық үкіметті дамыту индексінде әлем бойынша 24-орында тұр. Қазіргі таңда мемлекеттік қызметтердің 90,4 пайызы электрондық форматта көрсетіледі, ал олардың 95,9 пайызын смартфон арқылы алуға болады.
Елімізде азаматтарға қолжетімділікті арттыру мақсатында 39 цифрлық құжат енгізілді. 2025 жылдың басынан бері 51,5 млн-нан астам мемлекеттік қызмет көрсетілген.
Сонымен қатар eGov AI интеллектуалды кеңесшісі 2 млн-нан астам сұранысты өңдеп, мемлекеттік қызмет көрсету жүйесіне түсетін жүктемені азайтқан.
Жасанды интеллект инфрақұрылымы дамып келеді
Қазақстанда жасанды интеллект саласындағы ұлттық инфрақұрылымды қалыптастыру жұмыстары жүргізілуде. 2025 жылы іске қосылған Alem.Cloud ұлттық суперкомпьютерлік кластері әлемдегі ең қуатты есептеу жүйелерінің TOP500 рейтингіне еніп, 104-орынға тұрақтады.
Сондай-ақ Үкімет қуаты кемінде 1 ГВт болатын әлемдік деңгейдегі жасанды интеллект хабын – «Деректер орталықтарының алқабын» құру жобасын қолға алды.
Астанада ашылған alem.ai халықаралық жасанды интеллект орталығы білім беру, зерттеу және стартаптарды дамыту алаңына айналды. Орталықта балаларға арналған технологиялық бағдарламалар, AI-зертханалар және инновациялық жобаларды қолдау бағыттары іске асырылуда.
IT саласы мен стартаптарға қолдау күшейді
Бүгінде Astana Hub экожүйесінде 2 мыңнан астам компания жұмыс істейді. 2025 жылы Қазақстанның IT-қызметтер экспорты 1,1 млрд долларға жетті.
Соңғы бес жылда Astana Hub резиденттерінің жиынтық табысы 4,9 млрд долларды құрап, тартылған инвестициялар көлемі 910 млн доллардан асты.
Қазақстанда алғашқы технологиялық «бірмүйізді» компания – Higgsfield.ai пайда болды. Алдағы жылдары жасанды интеллект саласында 10 мың маман даярлау және IT-қызметтер экспортын 5 млрд долларға жеткізу жоспарланып отыр.
Цифрлық экономика және жаңа технологиялар
Қазақстан нақты секторларда да жасанды интеллект шешімдерін енгізуде. Astana Smart City жобасы аясында жол қозғалысын бақылау, денсаулық сақтау, құқықтық кеңес беру және мемлекеттік басқару салаларында AI технологиялары қолданылуда.
Телекоммуникация саласына соңғы үш жылда 1 трлн теңгеден астам инвестиция тартылды. 2027 жылдың соңына дейін 3 мыңнан астам ауылды жоғары жылдамдықты интернетпен қамту жоспарланған.
Сонымен қатар Қазақстанда спутниктік интернетті дамыту, пойыздарға интернет енгізу және ғарыш инфрақұрылымын жаңғырту бағытында жобалар жүзеге асырылып жатыр.
Қазақстанның халықаралық цифрлық бастамалары
Қазақстан жасанды интеллект саласындағы халықаралық ынтымақтастықты да кеңейтуде. Мемлекет басшысы Қасым-Жомарт Тоқаев Жасанды интеллект жөніндегі дүниежүзілік конференцияда Қазақстанның технологиялық даму бағытын таныстырып, жасанды интеллектіні адам игілігі үшін пайдаланудың маңызын атап өтті.
Еліміз OpenAI, Microsoft, NVIDIA және Cisco сияқты әлемдік технологиялық компаниялармен әріптестікті дамытып келеді.
Цифрландыру мен жасанды интеллектіні дамыту Қазақстанның технологиялық тәуелсіздігін нығайтып, экономиканың жаңа бағыттарын қалыптастыруға мүмкіндік береді.
