ADYM.KZ / Кәмелетке толмағандар арасындағы құқық бұзушылықтардың дені түнгі уақытта орын алатыны заңдылық. ҚР Әкімшілік құқық бұзушылық кодексіне сәйкес, кәмелетке толмаған балалардың заңды өкілдерінсіз түнгі сағат 22:00-ден кейін көшеде, ал ойын-сауық орындарында 23:00-ден кейін жүруіне тыйым салынған.
Шымкент қаласында ювеналды полиция қызметкерлері мен еріктілердің қатысуымен «Түнгі қала» рейдтік іс-шаралары тұрақты түрде өткізіледі. Соңғы айларда өткізілген рейдтер барысында түнгі уақытта ересектердің қарауынсыз жүрген ондаған жасөспірім анықталып, олардың ата-аналарына қатысты әкімшілік хаттамалар толтырылып, айыппұлдар салынды.
Ювеналды полиция бөлімінің бастығы, полиция подполковнигі Ләззат Сейітова ата-аналардың жауапкершілігіне тоқталды:
«Бала тәрбиесі – тек мектептің немесе мемлекеттің емес, ең алдымен отбасының қасиетті борышы. Көптеген ата-ана жасөспірімнің түнгі уақытта қайда жүргенін, кіммен араласатынын бақыламайды. Салдарынан жастар әртүрлі құқық бұзушылықтың құрбаны немесе қатысушысы болып жатады. Әрбір ата-ана баласының түнгі қауіпсіздігі үшін заң алдында жауапты екенін ұмытпауы тиіс».
Түсіндіру жұмыстары барысында ата-аналарға балалардың қауіпсіздігін қамтамасыз ету отбасылық тәрбиенің ажырамас бөлігі екені ескертіліп, қала тұрғындарына арнайы жадынамалар таратылуда.
