ADYM.KZ / Қазақстандық әнші Ақерке Амалят Витебск қаласында өткен XXXIV Халықаралық өнер фестивалі аясындағы «Славян базары» халықаралық эстрадалық ән орындаушылары байқауында бірінші орынға ие болды.
Байқаудың екі кезеңінің қорытындысы бойынша қазылар алқасы қазақстандық өнерпаздың өнеріне 134 ұпай берді. Осылайша ол жеңімпаз атанған Италия өкілі Сораядан небәрі бір ұпайға қалып қойды. Бас жүлде иегері 135 ұпай жинады.
– «Славян базары» байқауының сахнасына алғаш рет 15 жасымда шықтым. Бұл – ұзақ жолдың жемісі. Бірінші орын алғаныма және елге жеңіспен оралатыныма өте қуаныштымын, – деді Ақерке Амалят.
Екінші орынды Беларусь әншісі Елена Кузнецова мен Молдова өкілі Алексей Осичев өзара бөлісті. Ал үшінші орын Қырғызстаннан келген Нұрдоолот Деркембаев пен Грузия әншісі Важа Гаделияға бұйырды.
Биыл байқауда бас жүлде үшін 19 елдің өнерпаздары бақ сынады. Алғашқы кезеңде қатысушылар әлемдік хит әндерді фонограмма («минус 1») сүйемелдеуімен орындаса, екінші кезеңде Ұлттық Президент оркестрінің сүйемелдеуімен славян тіліндегі шығармаларды ұсынды.
Айта кетейік, «Витебскідегі Славян базары» халықаралық өнер фестивалі 1992 жылдан бері жыл сайын Беларусьтің Витебск қаласында өткізіліп келеді. Ол ТМД және Шығыс Еуропа кеңістігіндегі ең беделді мәдени форумдардың бірі саналады.
