ADYM.KZ / АҚШ Президенті Дональд Трамп пен Израиль Премьер-министрі Биньямин Нетаньяху арасындағы шиеленіс Израильдің Ливандағы әскери операцияларын кеңейту жоспарынан кейін шегіне жетті. Axios басылымының дереккөздері бұл телефондық келіссөзді екі лидердің мансабындағы ең ауыр әрі жанжалды сәт деп бағалады. АҚШ Президенті Дональд Трамп Нетаньяхудың Ливан астанасы Бейрутті бомбалау және әскер кіргізу туралы шешіміне қатты ашуланып, телефон арқылы балағат сөздермен айқайлаған: «Сен жындысың»: Трамп Израиль премьерін «есінен алжасқан» (crazy) деп атап, Ливандағы бейбіт тұрғындардың жаппай қырылуы мен ғимараттардың қирауын қатаң сынады.
Сондай-ақ, Трамп: «Мен болмасам, түрмеде отырар едің», деп Нетаньяхуға өзінің бұған дейін көрсеткен саяси және дипломатиялық қолдауын ескертіп, жемқорлық істері бойынша түрмеден аман алып қалғанын ашық бетіне басқан. АҚШ басшысы бұл агрессияның кесірінен халықаралық аренада Нетаньяхуды да, Израиль мемлекетін де бүкіл әлем жек көріп кеткенін айтты.
Трамп әкімшілігі қазіргі уақытта Иранмен соғысты тоқтату және Ормуз бұғазын қайта ашу бойынша өте маңызды бейбіт келісімдер жүргізіп жатыр. Израильдің Ливандағы «Хезболла» тобына соққы жасауы бұл келіссөздерді толықтай құрдымға жібере жаздады.
Нетаньяху Иран мен оның одақтастарын тек әскери күшпен басуды көздесе, Трамп бұл жағдайды тезірек дипломатиялық жеңіске айналдырып, соғысты тоқтатқысы келеді.
Қатты қысымнан кейін Нетаньяху райынан қайтуға мәжбүр болды. Трамп өзінің Truth Social желісінде Бейрутке ешқандай Израиль әскері кірмейтінін, ал бет алғандары кері қайтарылғанын жариялады. Сондай-ақ, делдалдар арқылы «Хезболламен» де атысты уақытша тоқтату туралы келісім жасалған. Бұл оқиға Таяу Шығыстағы негізгі шешімдерді әлі де Вашингтон қабылдайтынын көрсетті.
