ADYM.KZ / Ағымдағы жылдың 19-28 маусым аралығында Ақмола облысы, Щучинск қаласында велоспорттан тасжолдағы Қазақстан Республикасының чемпионаты жалауын көтереді. Бұл туралы Қазақстан Республикасы Ұлттық олимпиадалық комитетінің (ҰОК) баспасөз қызметі ресми мәлімдеді.
Бұл республикалық дода — отандық велошабандоздар үшін маусымның ең басты және ең ауқымды ұлттық старттарының бірі болмақ.
Дүбірлі додада еліміздің түкпір-түкпірінен жиналған ең мықты спортшылар бақ сынайды. Турнир аясында ересектер (Pro), жастар (U-23). жасөспірімдер (юниорлар) санаты бойынша жеңімпаздар анықталады.
Велошабандоздар тасжол бойындағы күрделі әрі тартысты қашықтықтарда жүлделерді өзара сарапқа салады. Жарыс бағдарламасына сәйкес медалдар жекелей жарыс (индивидуальная гонка), топтық жарыс (групповая гонка); командалық жарыс (командная гонка) тасжол дисциплиналары бойынша үлестіріледі:
Спорт сарапшыларының айтуынша, биылғы чемпионат бәсекелестіктің жоғары деңгейде өтуімен ерекшеленбек. Себебі, осы турнирдің қорытындысы бойынша велоспорттан Қазақстан ұлттық құрамасының жаңа маусымдағы алдағы халықаралық жарыстарға қатысатын негізгі құрамы мен резерві айқындалады.
Шара өтетін Бурабай баурайындағы (Щучинск) табиғи рельеф пен тасжолдардың сапасы спортшылардың шынайы шеберлігі мен төзімділігін сынауға толықтай мүмкіндік береді. Жарыстың нақты кестесі мен жүру бағыттары (маршруттары) алдағы күндері жарияланады.
